U Polščy ŭkrainiec udaryŭ nažom biełarusa. Jany mahli razyścisia ŭ acency vajny
U polskim Lublinie ŭ zamachu na zabojstva biełarusa padazrajuć 34-hadovaha ŭkrainca Maksima V. Mužčyny razam vypivali i padčas hetaha, pa viersii abvinavačanaha, pačali spračacca pra vajnu va Ukrainie. Skončyłasia tym, što ŭkrainiec napaŭ na apanienta z nažom, piša Interia.pl.
04.08.2022 / 18:58
Fota ilustracyjnaje
Prakuratura Lublina vyśvietliła, što 1 sakavika Jaŭhien B. pryjechaŭ ź Biełarusi ŭ Kazłoŭku Lubartaŭskaha pavieta, dzie spyniŭsia ŭ adnoj z kvater, kab adbyć karancin pierad pačatkam pracy. Tam jon paznajomiŭsia z Maksimam V., ź jakim jany razam vypivali.
Jaŭhien B. paśla zastolla ŭžo źbiraŭsia kłaścisia spać, kali 34-hadovy mužčyna nakinuŭsia na jaho zzadu, schapiŭ adnoj rukoj, a druhoj nanios niekalki ŭdaraŭ nažom u hrudzi i pravaje plačo.
Biełarusu ŭdałosia ŭciačy, jon vybieh z budynka i spyniŭ na vulicy mašyny, vadzicieli jakich vyklikali chutkuju dapamohu i palicyju.
U toj ža dzień supracoŭniki palicyi, jakija patrulavali terytoryju, zatrymali Maksima V., padčas ahladu ŭ jaho znajšli rečy paranienaha. Padazravanaha zatrymali.
Pavodle prakuratury, na dopycie Maksim V. adrazu pryznaŭ, što machaŭ nažom u bok paciarpiełaha, ale patłumačyŭ, što nie chacieŭ nanosić jamu nažavyja ŭdary. Jon śćviardžaŭ, što spračaŭsia ź Jaŭhienam B. pra vajnu va Ukrainie, bo paciarpieły bok nibyta admaŭlaŭ, što rasijskija vojski napadajuć na Ukrainu i ź Biełarusi. Ź inšaha boku, biełarus śćviardžaje, što nie viedaje, jakimi matyvami kiravaŭsia ŭkrainiec.
Lubartaŭskaja rajonnaja prakuratura abvinavačvaje Maksima V. u zamachu na zabojstva, pryčynieńni škody zdaroŭju, kradziažy i stvareńni Jaŭhienu B. niepasrednaj niebiaśpieki dla žyćcia abo ciažkaha paškodžańnia zdaroŭja. Maksim V. raniej byŭ sudzimy za kiravańnie aŭtamabilem u niećviarozym stanie.