У Гомелі дзеці 9 і 10 гадоў клалі камяні на рэйкі. Іх затрымала ваенізаваная ахова
Інцыдэнт адбыўся 27 ліпеня ў другой палове дня на чыгунцы ў раёне Гомельскай ЦЭЦ-1. Школьнікі складвалі на рэйкі камяні, каб паглядзець, што будзе далей.
30.07.2022 / 10:45
Цягнік праехаў бесперашкодна, лакаматыў не атрымаў пашкоджанняў. Але брыгада заўважыла староннія прадметы, паведаміла пра гэта, і праз пару хвілін на перагон прыбыла ваенізаваная ахова БЧ, якая і затрымала хлопчыкаў, паведамляе выданне «Белка».
Старэйшаму з іх 10 гадоў, двум — па 9. Бацькі знаходзіліся на працы і не мелі паняцця аб тым, што іх сыны гуляюць на чыгунцы. Самі дзеці не ўсведамлялі, што іх «забаўка» небяспечна і для іх, і для руху цягнікоў.
Распачаты адміністрацыйны працэс. Паколькі дзеці не дасягнулі ўзросту прыцягнення да адказнасці, ён будзе спынены. Аднак разглядаецца пытанне аб прыцягненні да адказнасці бацькоў за невыкананне абавязкаў па выхаванні.