Пазняк: У выпадку загаду ваяваць з Украінай вайскоўцы маюць тры шляхі
Лідар Кансерватыўна-хрысціянскай партыі БНФ Зянон Пазняк звярнуўся да беларускіх вайскоўцаў з заклікам не выконваць магчымы загад аб удзеле ў вайне супраць Украіны, піша «Свабода».
09.07.2022 / 17:34
Паводле Пазняка, у выпадку такога загаду вайскоўцы маюць тры шляхі:
- Першы шлях — «ганебны і самагубны для вас і для гонару нашай краіны» — падпарадкавацца, ступіць на Украіну са зброяй і забіваць украінцаў на іх зямлі, «і таксама прыняць ад іх сваю бессэнсоўную смерць».
- Другі шлях — падняць белы сцяг і перайсці на бок украінцаў. «Вы будзеце абароненыя міжнароднымі законамі. Гэта не палон. Адмова ад чужой маскоўскай несправядлівай вайны, адмова быць агрэсарам, адмова ваяваць з суседам забяспечыць вам статус жыцця ў любой краіне ААН альбо магчымасць (хто пажадае) ваяваць супраць рашысцкага мордара на баку ўкраінцаў у беларускіх вайсковых аддзелах».
- Трэці шлях — гэта «шлях герояў і патрыётаў Айчыны. Перагрупавацца, павярнуць назад і пайсці на Мінск вызваляць Беларусь ад акупацыі прамаскоўскага рэжыму».
Зянон Пазняк лічыць, што Расія хоча ўцягнуць беларускія войскі ў вайну, каб захапіць Беларусь.
«Крэмль нічога не заваюе, загнаўшы беларускае войска на Украіну. Масква спадзяваецца на тое, што нематываванае беларускае войска амаль гарантавана будзе панішчанае і разбітае ўкраінцамі, і тады пры ўсіх раскладах і паваротах Масква можа захапіць Беларусь голымі рукамі. Бараніць краіну не будзе каму».