Maskoŭskamu deputatu dali siem hadoŭ za toje, što nazvaŭ vajnu vajnoj
Heta pieršy prysud pa artykule ab «raspaŭsiudžvańni fejkaŭ pra rasijskija vojski» z realna pryznačanym terminam, piša «Radio Svoboda». 60-hadovy juryst Alaksiej Horynaŭ asudžany za vystup na pasiadžeńni municypalnaha savieta, na jakim prysutničała niekalki čałaviek.
08.07.2022 / 13:48
Na pačatku krasavika prakramloŭskija telehram-kanały raspaŭsiudžvali spasyłku na zapis pasiadžeńnia, jakoje adbyłosia 15 sakavika. Deputaty, pa prapanovie Horynava, abjavili chvilinu maŭčańnia ŭ pamiać ab achviarach ahresii va Ukrainie. Deputat taksama adznačyŭ, što ŭsie namahańni hramadzianskaj supolnaści ŭ Rasii pavinny być nakiravanyja na toje, kab spynić vajnu.
U apošnim słovie Horynaŭ zajaviŭ, što ličyć vajnu «samym chutkim srodkam rasčałaviečvańnia».
«Ja miarkuju, što Rasija vyčarpała svoj limit na vojny jašče ŭ XX stahoddzi. Adnak naša rečaisnaść — heta Buča, Irpień, Hastomiel. Vam kažuć niešta hetyja imiony? Pacikaŭciesia i nie kažycie potym, što ničoha nie viedali», — skazaŭ jon.