Hod «chatniaj chimii» dali za kamientar na adras Dźmitryja Bałaby
Siońnia ŭ sudzie Maładziečna i Maładziečanskaha rajona vyniesieny prysud 24-hadovamu Arciemiju Kartavienkavu. Suddzia Vadzim Pietrusievič pryznaŭ chłopca vinavatym pavodle art. 369 Kryminalnaha kodeksa («Abraza pradstaŭnika ŭłady») i asudziŭ jaho da hoda abmiežavańnia voli biez nakiravańnia ŭ PUAT — «chatniaj chimii», piša «Viasna».
01.07.2022 / 20:17
Dźmitryj Bałaba
Paciarpiełym pa spravie vystupaŭ načalnik minskaha AMAPa Dźmitryj Bałaba. Arciemij Kartavienkaŭ u čacie «Karatiełi» u žniŭni 2020 hoda pakinuŭ kamientar «mužičok počuvstvovał siebia … słiškom, pora napomniť jemu, kto on — kusok …!» pad fotazdymkam, na jakim student vybačajecca pierad Bałabam.
Načalnik AMAPa acaniŭ naniesienuju jamu maralnuju škodu ŭ 1500 rubloŭ: mienavita stolki abvinavačany musić vypłacić na jahonuju karyść. Bałaba paprasiŭ, kab jon pieraličyŭ hrošy ŭ Dom dziciaci №1. Taksama suddzia pastanaviŭ vypłacić try bazavyja vieličyni (96 rubloŭ) za sudovyja vydatki.
Paciarpieły na pasiadžeńnie nie źjaviŭsia. Śviedkami pa spravie vystupili baćki abvinavačanaha, jaki pryznaŭ vinu całkam. Dziaržaŭnaja abvinavaŭca, jakoj była pamočnica prakurora Jułija Žuk, zaprasiła ŭ jakaści pakarańnia 1,5 hoda «chatniaj chimii», adnak suddzia Vadzim Pietrusievič źmienšyŭ jaho na paŭhoda.