Генштаб УСУ: У рамках праверкі падраздзяленні беларускіх войскаў прыводзяць у найвышэйшыя ступені баявой гатоўнасці
Паводле інфармацыі Генеральнага штаба Узброеных сіл Украіны, у рамках праверкі, што праходзіць у Беларусі з 4 мая, войскі прыводзяцца ў найвышэйшыя ступені баявой гатоўнасці.
11.06.2022 / 20:22
Фота: «Ваяр»
«На Валынскім і Палескім напрамках падчас праверкі баявой гатоўнасці Узброеных сіл Рэспублікі Беларусь ажыццяўляецца прывядзенне падраздзяленняў у найвышэйшыя ступені баявой гатоўнасці, — гаворыцца ў зводцы ўкраінскага ваеннага камандавання. — Адпрацоўваюцца практычныя дзеянні па прыёме ваеннаабавязаных, праводзіцца зняцце з захоўвання ўзбраення і ваеннай тэхнікі».
4 мая ў беларускіх войсках пачалася праверка сіл рэагавання, а 7 чэрвеня — заняткі па баявой гатоўнасці, у рамках якіх, паводле інфармацыі Міністэрства абароны, адпрацоўваецца «перавод з мірнага на ваенны час».