G7 можа ўвесці парог цэн на расійскую нафту
Міністры фінансаў і кіраўнікі ЦБ краін Вялікай сямёркі не змаглі ў чацвер прыйсці да агульнага меркавання па характары патэнцыйных абмежаванняў на імпарт расійскай нафты. Пра гэта паведаміла журналістам кіраўніца Мінфіна ЗША Джанэт Елен па выніках першага дня двухдзённай сустрэчы, якая праходзіць у Нямеччыне.
20.05.2022 / 09:08
Паводле яе слоў, амерыканскі бок зрабіў прапанову аб увядзенні пошлін на імпарт расійскай нафты, каб абмежаваць даходы Масквы, захаваўшы пры гэтым аб'ём паставак энерганосьбітаў з Расіі. Пры гэтым прадстаўнікі еўрапейскіх краін дамагаліся ўвядзення паэтапнага эмбарга да канца года.
На думку Елен, атрымальнікі расійскай нафты могуць дасягнуць дамоўленасці, згодна з якой не будуць закупляць паліва па цэнах, вышэйшых за пэўны ўзровень. Яна лічыць, што такая ініцыятыва будзе паспяховай, калі да яе далучацца як мага больш краін.
Аднак канчатковага рашэння пакуль няма.
«Нічога на самай справе не выкрышталізавалася ў якасці відавочнай стратэгіі», — прыводзіць словы міністра агенцтва Reuters.