«Situacyja patavaja». Na «Azoŭstali» znachodziacca minimum 5 biełarusaŭ
Pradstaŭniki bataljona Kastusia Kalinoŭskaha ahučyli kolkaść biełarusaŭ, jakija znachodziacca na terytoryi maryupalskaha zavoda «Azoŭstal». Vierahodna, na hety momant nie mieniej za 5 našych suajčyńnikaŭ abaraniajuć akružany rasijskimi vajskoŭcami zavod. Pra heta paviedamili ŭ pramym efiry «Biełsata» pradstaŭniki biełaruskaha vajskovaha farmavańnia.
06.05.2022 / 15:34
Pradstaŭniki biełaruskaha bataljona raspaviali, što apošni raz suviaź z bajcami była 4 dni tamu.
«Jany ŭdała vajujuć i nie tolki trymajuć abaronu, ale jašče i robiać vyłazki nasustrač vorahu. Heta nie prosta pazicyjnaja vajna, ale adbyvajecca taktyčnaja vajna, kab na vulicach horada navat źniščać vorahaŭ», — paviedamiŭ pradstaŭnik bataljona Jan Mielnikaŭ.
Vajskoŭcy adznačajuć, što situacyja ŭ Maryupali zastajecca ciažkaj. U abaroncaŭ «Azoŭstali» zakančvajecca ŭzbrajeńnie, ježa i pitnaja vada.
Vajskoŭcy paviedamlajuć, što amal 80% abaroncaŭ paranienyja, mała śpiać i pry tym udała viaduć abaronu i navat robiać kontrnastupy.
«Toje, što aficyjna raspaviadajuć — ciapier na zavodzie bolš za 500 paranienych i siarod ich bolšaść z ranieńniami viaduć abaronu «Azoŭstali». Navat kali zakančvalisia miedykamienty dla cyvilnych, to vajskoŭcy addavali im svaje. Toje samaje možna skazać i pra składanaje stanovišča z vadoj i ježaj. Prablema vialikaja i resurs amal vyčarpany. Ličanyja dni zastalisia», — dadaŭ Jan Mielnikaŭ.
Biełaruskija vajskoŭcy adznačajuć, što situacyja ŭ Maryupali patavaja i kazać pra debłakadu ciapier niemahčyma, bo pakul va Ukrainie nie chapaje nieabchodnaj artyleryi i SPA.
Składanaść i ŭ tym, što horad znachodzicca niedaloka ad miažy z Rasijaj, Čornaje mora zastajecca zabłakavanym dla padtrymki.