Maxar Technologies: Металургічны камбінат «Азоўсталь» у Марыупалі амаль разбураны
Спадарожнікавыя здымкі Maxar Technologies, апублікаваныя CNN, сведчаць пра тое, што металургічны камбінат «Азоўсталь» амаль разбураны. У дахах будынкаў маюцца вялікія дзіркі, некаторыя дахі цалкам абрынуліся, а шэраг будынкаў ператварыўся ў руіны.
30.04.2022 / 18:33
Многія жылыя і ўрадавыя будынкі, размешчаныя непасрэдна на ўсход ад завода, таксама цалкам разбураныя. Са спадарожнікавых здымкаў, аднак незразумела, ці разбурылі ваенныя ўдары якія-небудзь з падвальных памяшканняў.
Намеснік камандзіра палка «Азоў» Святаслаў Паламар учора расказаў CNN, што завод інтэнсіўна абстрэльваўся артылерыяй, караблямі і авіяўдарамі.
«Ёсць падвалы і бункеры, да якіх мы не можам дабрацца, таму што яны знаходзяцца пад заваламі, — сказаў ён. — Мы не ведаем, жывыя там людзі ці не. Там ёсць дзеці ва ўзросце ад чатырох месяцаў да 16 гадоў. Але ёсць людзі, замкнутыя ў месцах, куды немагчыма дабрацца».