Pačaŭsia sud nad pravaabaroncaj Marfaj Rabkovaj i jašče 9 palitviaźniami. Ich vinavaciać pa 10 artykułach Kryminalnaha kodeksa
U Minskim haradskim sudzie siońnia raspačynajecca sud adrazu nad dziesiaćciu palitźniavolenymi — kaardynatarkaj Vałanciorskaj słužby «Viasny» Marfaj Rabkovaj, vałancioram Andrejem Čapiukom, palitźniavolenymi aktyvistami anarchisckaha ruchu Akichiram Hajeŭskim-Chanadam, Alaksandram Franckievičam, Alaksiejem Hałaŭko, Alaksandram Kaźlankam, Paŭłam Špietnym, Mikitam Drancam, Andrejem Maračom, Daniłam Čulem. Ahułam, u hetaj spravie fihuruje 10 artykułaŭ Kryminalnaha kodeksa, a materyjały kryminalnaj spravy składajuć 160 tamoŭ. Razhladać hetuju hučnuju spravu pryznačyli suddziu Siarhieja Chrypača. Sud zrabili zakrytym. «Viasna» raspaviadaje pra ŭsio, što viadoma pra spravu i jaje fihurantaŭ.
25.04.2022 / 12:14
Palitviaźniaŭ Marfu Rabkovu, Andreja Čapiuka, Akichira Hajeŭskaha-Chanadu, Alaksandra Franckieviča, Alaksieja Hałaŭko, Alaksandra Kaźlanka, Paŭła Špietnaha, Mikitu Dranca, Andreja Marača, Daniłu Čula abvinavačvajuć u arhanizacyi, kiraŭnictvie ci ŭdziele ŭ anarchisckich hrupach «Rievolucionnoje diejstviie», «Narodnaja samooborona», «Rievolucijna dija» i sudziać za padziei pieryjadu 2016-2020 hadoŭ.
Što pakazalna, internet-resursy «Rievolucionnoje diejstviie / Narodnaja samooborona / Rievolucijna dija» MUS pryznaŭ ekstremisckim farmavańniem 2 listapada 2021 hoda — tolki paśla 8-15 miesiacaŭ paśla zatrymańnia ŭsich dziesiaciarych fihurantaŭ spravy. Ale, niahledziačy na heta, niekatoryja ź ich abvinavačvajucca ŭ stvareńni i ŭdziele ŭ ekstremisckim farmavańni (č. 1 i 3 art. 361-1 KK).
Troch palitźniavolenych, u tym liku Marfu Rabkovu, SK charaktaryzuje jak arhanizataraŭ i kiraŭnikoŭ šerahu «arhanizavanych złačynnych hrup, što mieli aŭtanomnyja jačejki ŭ rehijonach Biełarusi sa svaimi lidarami».
«Dla supraćpraŭnaj dziejnaści farmiravalisia «abščaki», była stvoranaja internet-krama pa realizacyi na terytoryi Biełarusi, Ukrainy i Rasii ekstremisckaj litaratury, adzieńnia i inšaj atrybutyki. U svaje šerahi lidary padbirali schilnuju da ekstremizmu moładź, aktyŭnych udzielnikaŭ fanackaha ruchu, šukali asobaŭ z dapamohaj sacsietak, ekstremisckich internet-resursaŭ i Telegram-kanałaŭ, jakija administrujucca imi», — zajaviŭ SK.
U vyniku dziesiać palitźniavolenych u zaležnaści ad roli i epizodaŭ ahułam abvinavačvajucca pa 10 artykułach Kryminalnaha kodeksa:
- č. 1 art. 293 (arhanizacyja masavych biesparadkaŭ) — Alaksandr Franckievič i Akichira Hajeŭski-Chanada;
- č. 2 art. 293 (udzieł u masavych biesparadkach) — Alaksandr Franckievič, Akichira Hajeŭski-Chanada, Andrej Čapiuk;
- č. 3 art. 293 (navučańnie asobaŭ dla ŭdziełu ŭ masavych biesparadkach) — Marfa Rabkova;
- č. 1 art. 285 (stvareńnie i kiravańnie złačynnaj arhanizacyjaj) — Akichira Hajeŭski-Chanada, Alaksandr Franckievič, Alaksiej Hałaŭko, Marfa Rabkova;
- č. 3 art. 361 (zakliki da dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś z vykarystańniem srodkaŭ masavaj infarmacyi abo hłabalnaj kampjutarnaj sietki internet) — Akichira Hajeŭski-Chanada, Alaksandr Franckievič, Marfa Rabkova;
- č. 1 i 3 art. 361-1 (stvareńnie ekstremisckaha farmavańnia i ŭdzieł u im) — Akichira Hajeŭski-Chanada, Alaksandr Franckievič, Alaksiej Hałaŭko, Marfa Rabkova;
- č. 1 art. 342 (arhanizacyja hrupavych dziejańniaŭ, jakija hruba parušajuć hramadski paradak) (za «Marš niedarmajedaŭ» 5 sakavika 2017 hoda) — Pavieł Špietny, Alaksandr Kaźlenka, Mikita Draniec, Alaksiej Hałaŭko, Andrej Marač, Alaksandr Franckievič, Akichira Hajeŭski-Chanada;
- č. 1 art. 342 (arhanizacyja hrupavych dziejańniaŭ, jakija hruba parušajuć hramadski paradak) — za pierakryćcio trasy M1 na vyjeździe z Bresta ŭ 2018 hodzie — Akichira Hajeŭski-Chanada, Alaksandr Kaźlanka, Alaksandr Franckievič, Mikita Draniec, Alaksiej Hałaŭko, Daniła Čul;
- č. 1 i art. 130 (raspalvańnie inšaj sacyjalnaj varožaści) — Akichira Hajeŭski-Chanada, Alaksandr Franckievič, Marfa Rabkova;
- č. 2 art. 339 (złosnaje chulihanstva) (za lampački z farbaj, kinutyja ŭ ščyty z rekłamaj DAI ŭ 2016 hodzie i za lampački z farbaj, kinutyja ŭ budynak BTRK u 2016 hodzie) — Marfa Rabkova;
- č. 2 art. 339 (złosnaje chulihanstva) (za dymavuju šašku, kinutuju ŭ budynak bresckaha HUBAZiKa ŭ 2016 hodzie) — Pavieł Špietny, Alaksandr Franckievič, Marfa Rabkova, Akichira Hajeŭski-Chanada;
- art. 341 (apahańvańnie zbudavańniaŭ i psavańnie majomaści) (pieršamajskaje hrafici ŭ Breście ŭ 2020 hodzie) — Alaksiej Hałaŭko, Andrej Marač, Alaksandr Franckievič, Marfa Rabkova, Akichira Hajeŭski-Chanada;
- art. 341 (apahańvańnie zbudavańniaŭ i psavańnie majomaści) (hrafici suprać Jeŭrapiejskich hulniaŭ u 2019 hodzie) — Akichira Hajeŭski-Chanada, Andrej Čapiuk, Alaksandr Franckievič, Marfa Rabkova;
- č. 3 art. 218, č. 3 art. 339, č. 2. art. 295-3 (niezakonnyja dziejańni ŭ dačynieńni da pradmietaŭ, dziejańnie jakich zasnavanaje na vykarystańni haručych rečyvaŭ, učynienyja hrupaj asob) — padpał homielskaj padatkovaj inśpiekcyi i rekłamnaha ščyta ŭpraŭleńnia prymusovaha vykanańnia pakarańniaŭ u Ivacevičach u 2017 hodzie — Alaksandr Franckievič, Marfa Rabkova.
Pa infarmacyi Alaksandra Kaźlanki, ź dziesiaci čałaviek vosiem admovilisia davać pakazańni pa spravie.
U asobnuju vytvorčaść vyłučanaja kryminalnaja sprava ŭ dačynieńni tych, chto źjechaŭ za miažu — Dźmitryja Leŭčuka, Artura Kandratoviča, Ramana Chaliłava i Jaŭhiena Žuraŭskaha, a taksama «nieŭstanoŭlenych asobaŭ».
Źbićcio, pahrozy i doŭhaje ŭtrymańnie pad vartaj
Jak raniej raspaviadała «Viaśnie» maci palitviaźnia Alaksandra Franckieviča, paśla zatrymańnia ŭ dačynieńni da jaje syna ŭžyvalisia katavańni. Hetuju infarmacyju jana daviedałasia ad sukamiernika Alaksandra ź SIZA-1. Jon pieradaŭ, što Alaksandra źbivali ŭ KDB, bili elektrašokieram u vobłaść pachviny, pry hetym patrabavali pryznać vinu. U jaho prysutnaści taksama byŭ mocna źbity jašče adzin fihurant hetaj spravy, Akichira Hajeŭski-Chanada. Taksama supracoŭniki KDB paźniej prychodzili ŭ kamieru, dzie siadzić Alaksandr, i znoŭ praz pahrozy i zapałochvańni patrabavali padpisać pryznańnie viny, čaho toj nie zrabiŭ.
Pra źbićcio, pahrozy i žorskaje abychodžańnie raspavioŭ ź SIZA-1 jašče adzin fihurant spravy, jakoha zatrymali 2 sakavika minułaha hoda, — Alaksandr Kaźlanka:
«2 sakavika kala 8 ranicy mianie zatrymali doma brescki AMAP i minski HUBAZiK. Mianie dastavili ŭ brescki addzieł HUBZiKa, dzie prykuli ŭ dziažurnym pamiaškańni da krataŭ, zadraŭšy ruki za śpinaj u stajačym stanoviščy. Kab stajać u bolš mienš zručnaj pozie, davodziłasia padymacca na dybački. U takim stanoviščy prastajaŭ kala hadziny i adzin raz amal straciŭ prytomnaść. Zatym padyšoŭ adzin ź minskaha HUBZiKa i skazaŭ, što kali ja nie dam paroli ad noŭtbuka i Telehrama, to mianie buduć katavać, jak Mikałaja Dziadka. Ja padumaŭ, što nie hatovy da katavańniaŭ z-za hetych parolaŭ, i pahadziŭsia ich dać (potym jašče daŭ parol ad knopkavaha telefona).
Uvohule, u bresckim HUBAZiKu prabyŭ paŭtary hadziny. Zatym mianie zaviali ŭ bus i pasadzili na padłohu, ruki byli ŭ kajdankach za śpinoj. U hety ž bus zaviali i hetak ža pasadzili Andreja Marača i troch nieviadomych mnie ludziej. Nas pieciarych pavieźli ŭ Minsk u Śledčy kamitet (u ahulnaj składanaści ŭ mianie ruki za śpinaj u kajdankach byli hadzin siem, a potym ja miesiac vialiki palec levaj ruki nie adčuvaŭ).
Jak tolki pierad SK mianie vyvieli z busa, kiraŭnik śledčaj hrupy Cybulski I. A. pačaŭ pahražać, što kali ja nie pajdu na supracoŭnictva sa śledstvam, to pajedu ŭ łahier na siem hadoŭ. Ja admoviŭsia supracoŭničać. U prybiralni SK dva [supracoŭniki] HUBZiKi źniali mianie na videa. Ja admoviŭsia nazyvać na videa svaje danyja i kazać pra siabie, z-za čaho adzin ź ich udaryŭ mianie kułakom u hrudzi. Ja dla siabie vyrašyŭ, što nie budu na kamieru ničoha kazać, navat kali buduć katavać. Mnie trochi pahrazili, ale bolš nie bili, choć ja tak ničoha i nie skazaŭ».
Kaardynatarka vałanciorskaj słužby «Viasny» utrymlivajecca za kratami pad śledstvam užo adzin hod i siem miesiacaŭ — za hety čas u jaje surjozna pahoršyłasia zdaroŭje. Jana jak minimum dvojčy stračvała prytomnaść (u červieni i lipieni 2021 hoda). Taksama dziaŭčyna niekalki razoŭ chvareła na COVID-19 — u žniŭni i śniežni 2021, a taksama drenna pačuvałasia i na pačatku 2022 hoda.
Da taho ž Marfa ŭvieś čas adčuvaje boli ŭ žyvacie, a taksama ŭ jaje zapalilisia limfavuzły na šyi. Analizy kryvi, zroblenyja Marfaj jašče ŭvosień 2021 hoda, byli drennymi: vyjaŭleny nizki hiemahłabin i prykmiety zapalenčaha pracesu. Tamu pravaabaronca pačała damahacca praviadzieńnia UHD. Jaho, jak stała viadoma «Viaśnie», zrabili Rabkovaj tolki ŭ sakaviku 2022 hoda — i ŭ vyniku znajšli vadkaść u małym tazie.Taki stan vyklikaje surjoznuju zaniepakojenaść, bo patrabuje nieadkładnaha abśledavańnia — chirurhičnaha i hiniekałahičnaha. Akramia taho, padčas UHD u ščytapadobnaj załozie dziaŭčyny było vyjaŭlena šmat ačahovych utvareńniaŭ i kist. Kab vyznačyć charaktar hetych novaŭtvareńniaŭ, nieabchodna pravieści dadatkovaje abśledavańnie. Taksama ŭ Marfy Rabkovoj praciahvajuć razburacca i kryšycca zuby. Dazvoł na naviedvańnie stamatołaha joj nie dajuć užo kala dzieviaci miesiacaŭ.
Kaardynatarka Vałanciorskaj słužby «Viasny» Marfa Rabkova
Marfa była zatrymanaja supracoŭnikami HUBAZiKa ŭ Minsku 17 vieraśnia 2020 hoda, kali viartałasia z uručeńnia «Viaśnie» premii Jana Karskaha. Doma ŭ jaje praviali pieratrus, a Marfu z mužam Vadzimam zatrymali i dastavili ŭ HUBAZiK. Pieršapačatkova joj vystavili abvinavačvańnie tolki pa č. 3 art. 293 Kryminalnaha kodeksa za arhanizacyju vałancioraŭ-naziralnikaŭ za vybarami prezidenta u miežach kampanii «Pravaabaroncy za svabodnyja vybary». Paźniej Marfie vystavili novyja abvinavačvańni — pa č. 3 art. 130 i č. 2 art. 285 Kryminalnaha kodeksa. U listapadzie 2021 hoda pravaabaronca ŭ liście da rodnych paviedamiła, što sudzić jaje buduć pa 11 artykułach Kryminalnaha kodeksa.
Marfa Rabkova ŭ sudzie
Niehledziačy na doŭhaje ŭtrymańnie pad vartaj, padčas jakoha ŭ jaje pamierli babula i baćka, prablemy sa zdaroŭjem, Marfa nie pryznaje vinu. Śledčyja nieadnarazova prapanoŭvali joj supracoŭnictva: za pryznańnie viny joj źmieniać mieru strymańnia i adpuściać da chvorych baćkoŭ. Ale Marfa pryncypovaja ŭ svajoj pazicyi.
Vałancior «Viasny» Andrej Čapiuk
Andreja zatrymali praz paŭmiesiaca paśla zatrymańnia Marfy — 2 kastryčnika 2020 hoda. Z taho času jon utrymlivajecca pad vartaj u SIZA-1.
U miežach svajoj pravaabarončaj dziejnaści Marfa Rabkova i Andrej Čapiuk razam z vałanciorami «Viasny» ažyćciaŭlali nazirańnie za praviadzieńniem mirnych schodaŭ, prymali aktyŭny ŭdzieł u kampanii niezaležnaha nazirańnia «Pravaabaroncy za svabodnyja vybary», udzielničali ŭ dakumientavańni śviedčańniaŭ katavańniaŭ i inšych žorstkich vidaŭ abychodžańnia ŭ dačynieńni da zatrymanych udzielnikaŭ akcyj pratestu, dapamahali rodnym palitviaźniaŭ.
Akichira Hajeŭski-Chanada i Alaksandr Franckievič — pieršyja zatrymanyja pa spravie
Aktyvistaŭ anarchisckaha ruchu Akichira Hajeŭskaha-Chanadu i Alaksandra Franckieviča zatrymali razam 12 žniŭnia 2020 hoda.
Alaksandr Franckievič
«12 žniŭnia Achikira byŭ zatrymany razam z maim synam, — raspaviadała «Našaj Nivie» Taćciana, maci Alaksandra Franckieviča. — Pryjazdžali zatrymlivać Akichira, a Saša ŭ hety momant byŭ kala jaho, tamu zatrymali abodvuch. Prabili potym pa bazie nakont Sašy, a jon z palitviaźniaŭ 2010 hoda. I voś paśla Akreścina abodvuch advieźli ŭ KDB».
Sukamiernik Alaksandra ŭ žniŭni 2020 hoda raspaviadaŭ jaho maci, što zatrymanych anarchistaŭ źbivali i katavali paśla zatrymańnia.
Adrazu paśla zatrymańnia Akichira i Alaksandru vystavili abvinavačvańni pa č. 2 art. 293 Kryminalnaha kodeksa — udzieł u masavych biesparadkach. 28 studzienia stała viadoma, što suprać ich i jašče niekalkich čałaviek raspačataja kryminalnaja sprava pa č. 1 art. 285 Kryminalnaha kodeksa — stvareńnie złačynnaj arhanizacyi albo kiraŭnictva joj. Da suda kryminalnyja spravy suprać ich vyraśli da dziasiatka artykułaŭ Kryminalnaha kodeksa.
Bieraściejcy Pavieł Špietny, Alaksandr Kaźlanka, Andrej Marač, Daniła Čul, Alaksiej Hałaŭko, Mikita Draniec
Anarchista Alaksandra Kaźlanku, Paŭła Špietnaha, Andreja Marača, Daniłu Čula i Mikitu Dranca zatrymali 2 sakavika 2021 hoda. Kaźlanka raspavioŭ paźniej ź SIZA pra svajo zatrymańnie. Alaksiej Hałaŭko byŭ zatrymany praz try dni paśla hetaha. Usich ich pieravieźli ŭ IČU Minska, a potym — u SIZA-1 na Vaładarskaha.
U chutkim časie pra ich zatrymańnie adspravazdačyłasia MUS:
«Na siemiarych udzielnikaŭ «Revalucyjnaha dziejańnia» [chacia zatrymali šeść] vyjšli supracoŭniki HUBAZiK MUS padčas apieratyŭnaj pracy pa kryminalnaj spravie, zaviedzienaj pa fakcie stvareńnia złačynnaj arhanizacyi i ŭdziełu ŭ joj.
Pačynajučy z 2016 hoda, u roznyja pieryjady času jany rychtavalisia i ŭdzielničali ŭ akcyjach pravakacyjnaha i destruktyŭnaha kštałtu, uklučajučy masavyja biesparadki minułaha hoda ŭ Minsku i Bresckaj vobłaści».
Bolš za ŭsio artykułaŭ inkryminujecca Alaksieju Hałaŭko — jon abvinavačvajecca adrazu pa čatyroch punktach Kryminalnaha kodeksa: č. 1 art. 285 (stvareńnie i kiravańnie złačynnaj arhanizacyjaj), č. 1 i 3 art. 361-1 (stvareńnie ekstremisckaha farmavańnia i ŭdzieł u im), art. 341 Kryminalnaha kodeksa — apahańvańnie budynkaŭ i psavańnie majomaści, art. 342 Kryminalnaha kodeksa — arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich.
Viadoma, što ŭ asnovu abvinavačvańnia pa art. 342 Kryminalnaha loh epizod ź pierakryćciom daroh ŭ Breście ažno ŭ 2018 hodzie: 5 traŭnia taho hoda anarchisty błakavali try pałasy trasy M1, pratestujučy suprać budaŭnictva zavoda AKB. Akramia hetaha, brastaŭčanam inkryminujecca ŭdzieł u «Maršy niedarmajedaŭ» 5 sakavika 2017 hoda.
U palitźniavolenaha Paŭła Špietnaha z Bresta siońnia dzień naradžeńnia — u pieršy dzień suda jamu spaŭniajecca 25 hod.