Улады Кыргызстана забаранілі паказ трох расійскіх фільмаў пра Данбас
Улады Кыргызстана забаранілі пракат трох расійскіх фільмаў пра падзеі на Данбасе ў рамках фестывалю «Час праўды», паведаміў міністр культуры краіны Азамат Жаманкулаў.
24.04.2022 / 19:05
Арганізатар фэсту — грамадскае аб'яднанне «Рускі культурны цэнтр «Гармонія». У яго межах павінны былі паказаць знятыя ў 2019 годзе фільмы «Донбасс. Окраина», «Ополченочка» і «Солнцепёк». 18 красавіка цэнтр «Гармонія» звярнуўся ў дзяржаўны кінацэнтр «Кыргызтасмасы», каб атрымаць дазвол на паказ у краіне.
Па словах Жаманкулава, зварот быў разгледжаны. «У сувязі з цяперашняй міжнароднай сітуацыяй, а таксама ўлічваючы пазіцыю нейтралітэту Кыргызскай Рэспублікі, дзяржаўная ўстанова «Кыргызтасмасы» адклікае раней выдадзеныя пракатныя пасведчанні і накладвае забарону на паказ вышэй пералічаных фільмаў на тэрыторыі Кыргызскай Рэспублікі», — напісаў ён у Facebook.