Recept na vychadnyja. Francuzski cybulny sup — kłasika, pierad jakoj niemahčyma ŭstajać
Sup z cybuli pačali hatavać u staražytnym Rymie, paźniej jon pieratvaryŭsia ŭ lubimuju ježu francuzskich karaloŭ i hulakaŭ. Ciapier cybulny sup prapanujuć u bolšaści paryžskich restaranaŭ, ale ž ničoha nie pieraškadžaje vam pryhatavać hetuju stravu i ŭ siabie doma.
24.04.2022 / 08:01
Fota: BBC Food
Kab zvaryć francuzski cybulny sup, vam spatrebicca:
- 50 hramaŭ masła,
- 1 kiłahram tonka narezanych cybulin,
- 2 rastaŭčonyja zubki časnaku + jašče 2 zubki, razrezanyja na pałovy,
- 100 hramaŭ ciortaha syru hrujer (možna zamianić na emiental ci inšy cviordy syr),
- 100 mililitraŭ biełaha vina,
- kali mahčyma — 2 stałovyja łyžki vina madera + jašče trochi dla vodaru,
- 1 litr jałavičnaha bulonu,
- 8 toŭstych łustaŭ bahietu,
- sol i čorny pierac śviežaha pamołu,
- pasiečanaja piatruška dla padačy.
- Rastapicie masła ŭ kastruli siaredniaha pamieru. Dadajcie cybulu i rastaŭčony časnok i smažcie ich na nievialikim ahni 30-35 chvilin da momantu, kali cybula stanie miakkaj i nabudzie nasyčany ciomna-karyčnievy koler, pieryjadyčna pamiešvajcie. Hety etap pryhatavańnia vielmi važny, bo doŭhaje pavolnaje absmažvańnie cybuli nadaje supu cudoŭny bahaty smak i koler.
- Dadajcie biełaje vino i pieramiašajcie, pry hetym padymicie ŭvierch sa dna kastruli ŭsiu karyčnievuju cybulu. Daviadzicie sumieś da kipieńnia, dadajcie maderu (kali jaje ŭžyvajecie) i bulon.
- Znoŭ daviadzicie sumieś da kipieńnia i varycie jaje na pavolnym ahni 10-12 chvilin.
- Tym časam zrabicie krutony. Absmažcie chleb z abodvuch bakoŭ (jak na tosty) i natrycie tosty z adnaho z bakoŭ zubkom časnaku z boku razrezu. Pasypcie syram i pamiaścicie tosty ŭ duchoŭku na režym «hryl» na niekalki chvilin.
- Dadajcie ŭ sup sol i čorny pierac na smak, ulicie tudy niekalki stałovych łyžak madery, kab zrabić sup jašče bolš duchmianym, i dobra pieramiašajcie.
- Dla padačy raźlicie sup pa miskach i pakładzicie ŭ kožnuju ź ich hatovy kruton. Nieadkładna padavajcie, pakul krutony nie pamiakčejuć.