У расійскай Курскай вобласці ўводзяць «жоўты» ўзровень тэрарыстычнай небяспекі
У Курскай вобласці Расіі, якая мяжуе з Украінай, з 11 красавіка ўвядуць «жоўты» ўзровень тэрарыстычнай небяспекі. Пра гэта паведаміў тамтэйшы губернатар Раман Старавойт.
10.04.2022 / 17:43
Рашэнне, паводле слоў Старавойта, прынятае «ў сувязі з магчымымі правакацыямі з боку ўкраінскіх нацыяналістаў».
На тэрыторыі вобласці будуць усталяваныя кантрольныя пункты назірання (туды пасадзяць вайскоўцаў і паліцыю), таксама будзе ўзмоцнена патруляванне населеных пунктаў.
Жоўты ўзровень — другі па ўсталяванай шкале. Усяго іх 3: павышаны — сіні, высокі — жоўты і апошні, крытычны — чырвоны.
Учора губернатар Курскай вобласці заяўляў пра абстрэл з боку Украіны памежнага паста.
«Сёння ўвечары з боку Украіны з мінамётаў быў абстраляны памежны пост у раёне населенага пункта Елізаветаўка Глушкоўскага раёна. Ніхто не пацярпеў, разбурэнняў няма», — сцвярджаў расійскі бок.
Украіна не каментавала гэта паведамленне.