Праект «Беларускі Гаюн» публікуе персанальныя звесткі расійскіх салдат-марадзёраў. Рэкардсмен пераслаў дахаты амаль паўтоны
Учора тэлеграм-канал «Беларускі Гаюн» апублікаваў тры гадзіны запісаў з анлайн-камеры кур'ерскай службы СДЭК у Мазыры, праз якую расійскія салдаты-марадзёры адпраўляюць дахаты крадзеныя ва ўкраінцаў рэчы. Дзякуючы, як сцвярджае канал, неабыякавым людзям, ён атрымаў вялікі масіў асабістых звестак гэтых салдат і пачаў іх публікаваць.
04.04.2022 / 20:12
Асноўная маса выяўленых марадзёраў паходзіць з горада Рубцоўск Алтайскага края, але таксама ёсць з Гарняка (Алтайскі край), Чыты (Забайкальскі край), Жалезнагорска (Краснаярскі край), Омска, Ульянаўска, Новасібірска, Масквы, Ангарска (Іркуцкая вобласць), Усурыйска (Прыморскі край) і Бірабіджана (Яўрэйская аўтаномная вобласць).
Толькі за адзін дзень, 2 красавіка, расійскія салдаты здалі на адпраўку ў Мазырскі СДЭК больш за 2 тоны рэчаў, сярод якіх значная частка — крадзеныя. «Беларускі Гаюн» публікуе найперш звесткі рэкардсменаў, якія адправілі ад 50 да 450 кг.
Найбольш адзначыўся Яўген Каваленка, які даслаў у Рубцоўск 450 кг розных рэчаў, сярод якіх інструменты, музычныя калонкі, стол, палатка і іншае.