З Беларусі эвакуявалі яшчэ аднаго дзеяча культуры
З краіны эвакуявалі гукарэжысёра Тэатра юнага гледача Кірыла Салеева. Пра гэта паведаміў Андрэй Стрыжак.
21.02.2022 / 13:47
У студзені Кірылу Салееву прысудзілі тры гады «хіміі».
Яго вінавацілі па ч. 1 артыкула 342 Крымінальнага кодэкса («масавыя беспарадкі») за ўдзел у нядзельных маршах у Мінску 27 верасня і 25 кастрычніка 2020 года.
Суддзя Наталля Бугук не толькі прысудзіла хлопцу тры гады «хіміі», але і вынесла прыватнае вызначэнне ў бок кіраўніцтва Тэатра юнага гледача аб тым, каб у калектыве «праводзілася прафілактычная праца па недапушчэнні парушэння супрацоўнікамі заканадаўства аб масавых мерапрыемствах».
Кірыл быў вызвалены з-пад варты да пачатку адбыцця пакарання.