Лукашэнка падпісаў указ аб фармаванні рэестра адрасоў віртуальных кашалькоў, якія «выкарыстоўваліся ў супрацьпраўнай дзейнасці»
Аляксандр Лукашэнка падпісаў указ №48 «Аб рэестры адрасоў (ідэнтыфікатараў) віртуальных кашалькоў і асаблівасцях абароту крыптавалюты», паведамляе БелТА.
14.02.2022 / 21:40
Указ прадугледжвае фарміраванне Паркам высокіх тэхналогій рэестра адрасоў віртуальных кашалькоў, якія «выкарыстоўваліся ў супрацьпраўнай дзейнасці», і ўстанаўленне парадку яго функцыянавання.
Паведамляецца, што новы дакумент закліканы выключыць выпадкі ценявога фінансавання забароненай у Беларусі дзейнасці і абараніць удзельнікаў рынку лічбавых актываў ад страты маёмасці. Адказваць за гэта будзе Парк высокіх тэхналогій.
Згадкі ў тэксце закона пра супрацьпраўную дзейнасць ствараюць падазрэнні, што ён можа аказацца адным з мноства іншых рэпрэсіўных, прынятых за апошні год. Бо ў Беларусі як супрацьпраўную разглядаюць апошнім часам і фінансавую дапамогу рэпрэсаваным.