Стынг прадаў усе правы на свае песні Universal Music за 250 мільёнаў даляраў
Стынг прадаў правы на ўвесь свой музычны каталог, у тым ліку сольныя працы і запісы гурта The Police, найбуйнейшай у свеце гуказапісвальнай кампаніі Universal Music Group.
11.02.2022 / 08:00
Фота: Reuters
Сума традыцыйна не называецца, але профільныя СМІ са спасылкай на свае крыніцы называюць прыблізную лічбу — 250 млн даляраў.
«Для мяне вельмі важна, каб у маёй творчай спадчыны быў дом, дзе яго шануюць і паважаюць — не толькі для таго, каб па-новаму камунікаваць з адданымі прыхільнікамі, але і для таго, каб пазнаёміць з маімі песнямі новую аўдыторыю, музыкаў і пакаленні», — гаворыцца ў заяве Стынга, які большую частку сваёй кар'еры супрацоўнічаў з UMG, паведамляе Бі-бі-сі.
Па ўмовах дамовы, UMG атрымлівае правы на майстар-копіі песень, а таксама выдавецкія правы — яны пераходзяць падраздзяленню Universal Music Publishing Group.
«Стынг — геній аўтарскай песні, яго музыка пранізвае сусветную культуру, — сказаў кіраўнік Universal Music Group Люсьен Грэндж. — Для нас вялікі гонар, што ўсе працы Стынга як аўтара песень і выканаўцы цяпер будуць знаходзіцца ў сям'і UMG».
На пачатку студзеня стала вядома, што іншая гуказапісвальная кампанія «вялікай тройкі» — Warner Music Group — атрымала правы на творчую спадчыну Дэвіда Боўі.
Да гэтага паведамлялася аб продажы каталогаў Боба Дылана, Пола Саймана, Ніла Янга, спявачак Ціны Тэрнэр і Шакіры, гуртоў Blondie і Red Hot Chili Peppers, а таксама дыджэя Дэвіда Геты. Сумы ўсіх гэтых здзелак былі дзевяцізначныя.