У Нароўлі кіроўца працягнуў супрацоўніка міліцыі на дзвярах машыны. Ён спрабаваў уцячы ад пагоні
Уначы 30 студзеня супрацоўнікі нараўлянскай міліцыі звярнулі ўвагу на Opel з пабітым шклом і пашкоджаным кузавам. Яны вырашылі высветліць акалічнасці ўзнікнення пашкоджанняў і праверыць стан кіроўцы. Пасля гэтага пачалася пагоня, паведамляе прэс-служба УУС Гомельскага аблвыканкама.
01.02.2022 / 22:56
Мужчына заўважыў службовы УАЗ і паспрабаваў схавацца: на сігналы не рэагаваў, падчас пагоні ўсяляк перашкаджаў спробам яго абагнаць, блакаваў рух. У нейкі момант парушальнік паспрабаваў заехаць у двор прыватнага дома, аднак на павароце ўрэзаўся ў слуп.
Міліцыянты запатрабавалі заглушыць рухавік і выйсці з машыны, але кіроўца заблакаваўся і зноў пачаў рух, працягнуўшы міліцыянта на дзвярах аўто. У выніку яму разбілі бакавое шкло і спынілі машыну.
За рулём знаходзіўся 38-гадовы жыхар райцэнтра, які раней неаднаразова прыцягваўся да адміністрацыйнай і крымінальнай адказнасці і не меў вадзіцельскага пасведчання.
У дачыненні да яго распачалі крымінальную справу за супраціў супрацоўніку органаў унутраных спраў, спалучаны з ужываннем гвалту.