U Minsku źjavicca novy žyły kvartał z 15 dziesiacipaviarchovikaŭ u miežach vulic Jankoŭskaha i Hareckaha
U Minsku źjavicca novy žyły kvartał — hetym razam abiacajuć abuładkavać učastak u miežach vulic Jankoŭskaha i Hareckaha (heta tam, dzie supiermarkiet «Hipa»), piša Onliner.by.
30.12.2021 / 15:01
Terytoryja zabudovy salidnaja — 112 000 kv.m. Na praciahu nastupnych hadoŭ tut pavinny vyraści 15 dziesiacipaviarchovikaŭ.
Prajektam zojmiecca MAPID. Užo raspracavana kancepcyja zabudovy, jakaja praduhledžvaje viejernaje raskryćcio kvartała na vulicy Hareckaha z nastupnym stvareńniem zakrytaj unutranaj prastory za košt razhornutych błok-siekcyj.
U afarmleńni fasadaŭ upieršyniu razhladajecca prymianieńnie fibracemientnych plit, lohkich, daŭhaviečnych, ekałahičnych, jakija adroźnivajucca raznastajnaściu rasfarbovak i faktur.
Akramia ŭźviadzieńnia damoŭ, na terytoryi praduhledžany dva naziemnyja parkinhi pa 270 miescaŭ i dva padziemnyja pa 300, škoła na 780 miescaŭ, dziciačy sadok na 230 miescaŭ i ambułatoryja na vulicy Hareckaha.