Стала вядома, на які тэрмін хочуць садзіць у турму актывістаў закрытых НДА
На Нацыянальным прававым інтэрнэт-партале з'явіўся тэкст праекта закона, які ўводзіць крымінальную адказнасць за ўдзел у ліквідаваных і незарэгістраваных арганізацыях.
21.12.2021 / 19:54
Згодна з праектам, новы артыкул КК 193-1 называецца «Незаконныя арганізацыя дзейнасці грамадскага аб'яднання, рэлігійнай арганізацыі або фонду альбо ўдзел у іх дзейнасці».
Гэтыя дзеянні законапраект прапануе караць штрафам, або арыштам, або пазбаўленнем волі на тэрмін да двух гадоў.
Артыкул 193-1 не будзе распаўсюджвацца на арганізацыі, якія прызнаныя экстрэмісцкімі і забароненыя, для гэтых выпадкаў ёсць артыкул 423-1.
Таксама дзеянне артыкула 193-1 не будзе распаўсюджвацца на дзейнасць арганізацый, па якіх прынята рашэнне аб прыпыненні іх працы. А таксама на дзейнасць арганізацый, звязаную з праходжаннем дзяржрэгістрацыі ва ўстаноўленым парадку.
Людзі, якія добраахвотна спыняць дзеянні, што парушаюць артыкул 193-1, і заявяць пра гэта ў дзяржорганы, будуць вызваленыя ад крымінальнай адказнасці.
Нагадаем, у 2021 годзе ў Беларусі знішчылі сотні арганізацый грамадзянскага сектара.