Chalezin: Niejki pacuk prybraŭ z sankcyjnaha śpisu ES usie subjekty, jakija b nanieśli ŭdar pa Łukašenku
17.12.2020 / 16:36
Art-dyrektar Biełaruskaha Svabodnaha teatra, vykanaŭčy dyrektar Creative Politics Hub Mikałaj Chalezin byŭ siarod tych, chto aktyŭna łabiravaŭ sankcyjny śpis suprać łukašenkaŭcaŭ u Jeŭrasajuzie. Spadar Chalezin zasmučany vynikovym trecim sankcyjnym błokam, jaki 17 śniežnia pryniaŭ ES, — ličyć jaho zakarotkim, skazaŭ jon «Našaj Nivie».
Mikałaj Chalezin. Fota z fejsbuka.
«Dla mianie heta vyhladaje jak kpina. Samaje žachlivaje, što nad hetymi kiejsami pracavała ahramadnaja kolkaść ludziej — žurnalistaŭ, rasśledavalnikaŭ, supracoŭnikaŭ roznych śpiecsłužb. Šmat ludziej papracavała nad tym, kab padać Jeŭrasajuzu samy poŭny śpis.
Tam było bolš za sotniu sudździaŭ, z padrabiaznym apisańniem ich dziejańniaŭ, našmat bolš za sotniu siłavikoŭ. I kali kazać pra «kašalkoŭ», to byli pradstaŭleny kiejsy na ŭsich, chto pracuje ź siamjoj Łukašenki — heta paru dziasiatkaŭ proźviščaŭ. Heta samyja šyrokija kiejsy z padrabiaznaj infarmacyjaj pra kampanii, jakija zarehistravanyja ŭ roznych krainach śvietu, usio ŭziata z aficyjnych rejestraŭ, až da bieniefiecyjaraŭ kampanij.
U vyniku ž my ŭbačyli śpis, jaki składzieny absalutna pa niezrazumiełaj schiemie. Jasna, što ŭziali adusiul pakrychu, ale tyja ludzi, što składali kančatkovy śpis, nie majuć ujaŭleńnia, jak uładkavanaja sistema ŭ Biełarusi i ŭvohule jak žyvie Biełaruś. Jany navat nie razumiejuć sutnaści sankcyjnaha pracesu. Časam nie treba navat vialikaja kolkaść, ale zamarožvać patrebna cełyja siehmienty.
Umoŭna kažučy, u śpisy trapiŭ Mikałaj Varabiej, ale sensu ŭ hetym niama absalutna nijakaha. Kali my havorym pra kampaniju «Bremina hrup», jakoj addadzienyja pravy na spahnańnie hrošaj na tranzit, to tam zajmajucca try biznesmieny — Zajcaŭ, Varabiej, Aleksin. A ŭ vyniku tolki adzin čałaviek traplaje ŭ śpisy. Heta značyć, što praca nie spynicca.
Što tołku, što ŭ śpis trapiŭ Šakucin? Nabor jahonych kampanij u siońniašnim vyhladzie nijakaha prybytku prynosić nie budzie, bo dziaržava traplaje ciapier u zonu takoj turbulentnaści, što budzie ciažka vieści vysokatechnałahičny biznes. Pytańnie hrošaj, jakija kruciacca vakoł «siamji». Heta pierakładvańnie dziaržaŭnych hrošaj u pryvatnuju kišeniu. My tut možam havaryć pra farmakałohiju, cyharetny biznes, handal naftaj i kalijem.
Dla mianie prosta śmiešna, što zrabiŭ Jeŭrasajuz. Hara naradziła myš. Nichto nie pacierpić ad hetaha, tolki što spadarynia Kačanava nie źjeździć u Nicu. Ale mnie hetaha mała!
Ja razumieju, što jana adkaznaja za bolšyja hrachi. U nas jość usie kiejsy, i my budziem dumać, što ź imi rabić. Jość varyjant apublikavać, jość — pieradać na rasśledavańnie mižnarodnym bujnym hrupam, ci prosta spynicca, ale apošniaha my nie chočam. Bo heta nie naš biznes, a sprava biełaruskaha naroda.
Chutčej za ŭsio, heta była niejkaja praca łabistaŭ Pucina i Łukašenki. I heta nie kłasičny palityčny łabizm, a, kali kazać na turemnym žarhonie, «krysiatničastva». Niejki pacuk nibyta śpiecyjalna prybraŭ usie subjekty, jakija mahli b nanieści škodu Łukašenku. Ich usich prybrali! Adnaho ź ich, Aleksina, vykraślili ŭ apošni momant, prosta ručkaj, kali ŭžo prajšło ŭsie ŭzhadnieńni. Vielmi dziŭnaja historyja. I mnie zdajecca, što ŭnutry ES pavinny razabracca, chto tak efiektyŭna papracavaŭ nad hetym.
Ja miarkuju, što Mašenski nie trapiŭ u sankcyjnyja śpisy, bo kataŭsia na łyžach u Sočy z Łukašenkam i Pucinym. Na kaho-kaho, a na Mašenskaha kiejs vialiki, z usimi jahonymi pryhodami. Ale kali ty kataješsia na łyžach, to, viadoma, nikudy nie trapiš. Sprava ŭ tym, što ad takich sankcyj paciarpieli b ad 300 da 500 rasijskich kampanij, jakija pracujuć razam ź biełaruskimi, tamu rasijskija łabisty pracavali vielmi ščylna. Usio heta vykraślena! Upłyŭ Łaŭrova i Pucina, biezumoŭna, jość.
Nas zapeŭnivajuć, što ŭsie jašče trapiać u čaćviorty śpis. Ale ž ja razumieju, što łabisty z druhoha boku buduć taksama pracavać i jany svaje arhumienty buduć davać. Ciapier my krychu nie razumiejem, što rabić dalej, i heta adbyvajecca ad nierazumieńnia rečaŭ, jakija adbyvajucca ŭnutry Jeŭrasajuza».