Уладальніка крымскататарскага тэлеканала ATR асудзілі завочна на 19 гадоў калоніі за блэкаўт у 2015 годзе
10.12.2020 / 12:59
Радыё Свабода
Вярхоўны суд анексаванага Крыма ў чацвер завочна прысудзіў 19 гадоў калоніі строгага рэжыму бізнэсоўцу Ленуру Ісламаву праз абвінавачанне ў арганізацыі падрыву лініі электраперадач на поўдні Украіны ў 2015 годзе, што прывяло да блэкаўту на паўвостраве і шкоды на 2 млрд расійскіх рублёў. Прысуд вынесены завочна, Ісламаў апошнія гады жыве ва Украіне і абвешчаны ў вышук у Расіі.
Ісламава абвінавачвалі паводле трох артыкулаў — у стварэнні незаконнага ўзброенага фармавання, у публічных закліках да экстрэмізму і ў дыверсіі.
Ісламаў лічыць справу палітычна матываванай і выкліканай яго непрыманнем анексіі Крыма. Адвакат Ісламава Мікалай Полазаў заявіў у спрэчках, што абвінавачанне не падало ніякіх рэальных доказаў віны падсуднага.
Ленур Ісламаў — уладальнік крымскататарскага тэлеканала ATR, былы віцэ-прэм’ер Крыма пасля яго анексіі. Пасаду віцэ-прэм’ера ён атрымаў паводле квоты Меджліса крымскататарскага народа. У тым самым 2014 годзе з'ехаў ва Украіну і атрымаў украінскае грамадзянства.