«Uličvajučy sistematyčnaść žorstkaha abychodžańnia i katavańniaŭ u dačynieńni da vialikaj kolkaści biełarusaŭ»
Čamu za ździejśnienyja ŭ Biełarusi złačynstvy suprać čałaviečnaści kryminalnyja spravy mohuć zavodzicca ŭ inšych krainach, tłumačyć u siabie ŭ fejsbuku palitołah Andrej Jelisiejeŭ.
09.12.2020 / 23:02
Hienieralnaja prakuratura Biełarusi suprać litoŭskich kaleh: chto maje racyju?
Hienieralnaja prakuratura Biełarusi vybuchnuła krytykaj z nahody taho, što litoŭskaja prakuratura pačała pravierku ŭčynienych biełaruskimi siłavikami dziejańniaŭ u ramkach univiersalnaj jurysdykcyi. Mabyć, i zajava biełaruskaha MZS taksama nie prymusić siabie doŭha čakać.
Zajava biełaruskaj Hienprakuratury paklikanaja pierakanać hramadskaść, što litoŭcy biasčynstvujuć i pačynajuć biespadstaŭna leźci va ŭnutranyja spravy Biełarusi.
Situacyja i praŭda nieardynarnaja: zvyčajna nieabchodnaja suviaź pa terytoryi, hramadzianstvie ci inšych prykmietach pamiž dziaržavaj, jakaja ažyćciaŭlaje jurysdykcyju (u dadzienym vypadku, Litvoj), i razhladanymi (biełaruskimi) padziejami.
Adnak tut situacyja advarotnaja: hety vielmi redki ŭ pravavoj praktycy instrumient (univiersalnaja jurysdykcyja) vynikaje z biezzakońnia biełaruskich orhanaŭ.
Z času Niurnbierhskaha trybunała i jaho prysudu ŭ 1946 hodzie ličycca, što niekatoryja złačynstvy nosiać taki surjozny charaktar, što ich ździajśnieńnie kranaje sumleńnie ŭsiaho čałaviectva i padryvaje mir i biaśpieku ŭsich dziaržaŭ. A tamu dajuć kožnaj dziaržavie prava pieraśledvać u sudovym paradku tych, chto ich ździajśniaie, biezadnosna hramadzianstva i terytoryi ździajśnieńnia złačynstva.
U hetym i jość rezon univiersalnaj kryminalnaj jurysdykcyi — zabiaśpiečyć ździajśnieńnie pravasuddzia ŭ dačynieńni da asob, jakija ŭčynili asabliva ciažkija złačynstvy, luboj dziaržavaj. Na miescy Litvy mohuć być i Ukraina, i Čarnahoryja, i Uruhvaj.
Darečy, pryncyp univiersalnaj jurysdykcyi zafiksavany i ŭ biełaruskim kryminalnym kodeksie, a mienavita ŭ artykule 6.
Tam skazana, što kodeks prymianiajecca niezaležna ad kryminalnaha prava miesca ździajśnieńnia dziei i hramadzianstva ŭ dačynieńni da hienacydu, złačynstvaŭ suprać biaśpieki čałaviectva, vajennych złačynstvaŭ i šerahu inšych.
U apublikavanym miesiac tamu dakładzie ABSJe pryvodzicca cytata Hienieralnaha sakratara Suśvietnaj arhanizacyi suprać katavańniaŭ ab tym, što ŭličvajučy sistematyčnaść i maštabnaść prymianieńnia žorstkaha abychodžańnia i katavańniaŭ u dačynieńni da vialikaj kolkaści biełarusaŭ, heta «vidavočna śviedčyć ab złačynstvie suprać čałaviečnaści».
Tamu ŭ dadzienym vypadku havorka nie pra ŭmiašańnie va ŭnutranyja spravy Biełarusi, a pra sprobu Litvy zabiaśpiečyć pravasuddzie ŭ ramkach mižnarodnaha prava, pad normami jakoha padpisałasia ŭsia mižnarodnaja supolnaść, uklučajučy Biełaruś.