Jeŭrapiejskija pasły: Vykazvajem salidarnaść z usimi palityčnymi viaźniami ŭ Biełarusi
18.09.2020 / 17:03
Kiraŭniki dypłamatyčnych misij krain Jeŭrapiejskaha sajuza, što pracujuć u Minsku, zaklikali ułady ŭ Biełarusi dziejničać u adpaviednaści sa svaimi mižnarodnymi abaviazacielstvami i vyzvalić usich, chto źniavoleny ŭ Biełarusi pa palityčnych matyvach na praciahu apošnich niekalkich miesiacaŭ.
«My vykazvajem salidarnaść z usimi palityčnymi viaźniami ŭ Biełarusi — niekalkimi dziasiatkami mužčyn i žančyn, niespraviadliva źniavolenymi za abaronu i adstojvańnie asnoŭnych svabod i demakratyi. Ad siońnia kožny z nas budzie mieć pry sabie kopiju śpisa palityčnych viaźniaŭ u Biełarusi padčas kožnaj sustrečy ź biełaruskimi dziaržsłužačymi. My znoŭ padkreślivajem, što mirnaje i ŭstojlivaje ŭrehulavańnie biahučaha kryzisu moža być vynikam tolki ŭsioabdymnaha nacyjanalnaha dyjałoha pry poŭnym zachavańni asnoŭnych pravoŭ i svabod naroda Biełarusi i poŭnym zabieśpiačeńni zapatrabavanych narodam Biełarusi demakratyčnych pracedur», — havorycca ŭ zajavie.