Z podpisami za Babaryku tvaryłasia aby-što
udakładniena
03.07.2020 / 20:51
Udakładniena: 6 lipienia štab Viktara Babaryki ŭnios źmieny ŭ tablicu z kolkaściu podpisaŭ, pieradadzienych u terytaryjalnyja vybarčyja kamisii. Niekatoryja niesupadzieńni z aficyjnaj statystykaj vypravilisia, niekatoryja ŭsio jašče aktualnyja
Čytajcie. Štab Babaryki ŭdakładniŭ infarmacyju: podpisy ŭ Stoŭbcach i Uździe ŭsio ž byli zdadzienyja
***
«Naša Niva» praanalizavała kolkaść podpisaŭ, jakija zaličyli Viktaru Babaryku ŭ kožnym z rajonaŭ Biełarusi (dastupnyja źviestki pa ŭsich abłaściach, aproč Homielskaj), i paraŭnała ich z dadzienymi štaba. Atrymałasia aby-što.
Viktar Babaryka zanosić dakumienty ŭ CVK. Fota Nadziei Bužan
Situacyja pieršaja. Podpisy byli sabranyja, ale ich nie paśpieli zdać
Pavodle Vybarčaha kodeksa, zdavać podpisy ŭ terytaryjalnyja kamisii (a ich kala 150 pa ŭsioj krainie) mohuć tolki try čałavieki. Heta rehijanalny kaardynatar, kali jon byŭ paznačany pry rehistracyi inicyjatyŭnaj hrupy, kandydat ci kiraŭnik štaba.
I Viktar Babaryka, i jaho syn Eduard (kiraŭnik štaba) byli aryštavanyja, tamu nie paśpieli padać podpisy ŭ bolš za 60 rajonaŭ.
Asabliva kryŭdna za bujnyja pakiety dakumientaŭ — u Lidzie prapali 4292 podpisy, u Pružanach — 983 podpisy. A 9 tysiač podpisaŭ ź Pieršamajskaha rajona Minska Babaryka vioz z saboj, kali jaho zatrymali.
Situacyja druhaja. Babaryku zaličyli ŭsie hałasy
Takoje zdaryłasia tolki ŭ Pinsku (2887) i ŭ Salihorskim rajonie (4962).
Situacyja treciaja. U Babaryki zrezali častku hałasoŭ, ale astatniaje zaličyli
Pa zakonie ŭ kandydata moža być nie bolš za 15% «niapravilnych» podpisaŭ. U pryncypie, heta absalutna narmalnaja situacyja.
Naprykład, u Asipovičach u Babaryki zabrali tolki 1 podpis, u Słucku — 117 (5%). Takich rajonaŭ ahułam 17.
Situacyja čaćviortaja. U Babaryki było bolš za 15% «niapravilnych» hałasoŭ, ale reštu jamu ŭsio adno pakinuli.
Pavodle zakanadaŭstva, kamisija pavinna pravieryć nie mienš za 20% atrymanych podpisaŭ. Kali ŭ ich jość 15% niesapraŭdnych podpisaŭ, to na pravierku biarecca jašče 15%.
Paśla analizujucca hetyja pravieranyja 35%. Kali ŭ ich pa-raniejšamu bolš za 15% niesapraŭdnych podpisaŭ, to ŭ śmietnicu adpraŭlajucca ŭsie hałasy za kandydata.
U čatyroch rajonach u Babaryki nibyta zaškalvała kolkaść niapravilnych podpisaŭ, ale reštu jamu ŭsio adno čamuści zaličyli.
U Pinskim rajonie było padadziena 477 podpisaŭ, adnak pryznali sapraŭdnymi 334 podpisy. Atrymlivajecca, kamisija zarezała 143 podpisy (30% ad ahulnaj kolkaści). Značycca, pavodle zakona treba było vykidać i astatnija 334.
Takaja ž historyja była ŭ Mijorach, Smalavičach i Lachavičach.
Situacyja piataja. Babaryku zaličyli bolš hałasoŭ, čym padavałasia
Štab Viktara Babaryki zapeŭnivaje ŭ dakładnaj vieryfikacyi svaich dadzienych. Infarmacyju pra kolkaść podpisaŭ praviarali adrazu niekalki čałaviek. Tamu absalutna niezrazumiełaj vyhladaje situacyja ŭ 13 rajonach Biełarusi — tut Babaryku nibyta zaličyli bolš, čym było padadziena.
Pavodle padlikaŭ štaba, isnavali rajony (Staŭbcoŭski, Uździenski i Červieński), u jakija ŭvohule nie padavalisia podpisy. Vyjaviłasia, što ich padavaŭ kiraŭnik štaba Eduard Babaryka, adnak nie paśpieŭ paviedamić pra heta, tamu što byŭ zatrymany.