Brescki abłvykankam patrabuje ad kampanii Lemiašeŭskaha, što pabudavała akumulatarny zavod, viarnuć 5,7 miljona rubloŭ
04.09.2019 / 16:23
Viktar Lemiašeŭski. Fota Stanisłava Koršunava, Tut.by
Pra heta praciŭnikam budaŭnictva akumulatarnaha zavoda skazaŭ staršynia kamiteta ekanomiki Michaił Bacenka, piša Radyjo Svaboda.
Pra toje, što brescki abłvykankam razarvaŭ z kampanijaj «AjPauer» damovu ab vydzialeńni srodkaŭ inavacyjnaha fondu Bresckaha abłvykankama, žurnalistam skazaŭ kiraŭnik abłvykankama Anatol Lis.
Pra heta stała viadoma dva tydni tamu na śpiecyjalnaj pres-kanfierencyi. Hrošy ź biudžeta vobłaści vydzialalisia na budaŭnictva akumulatarnaha zavoda, bo jon byŭ pryznany inavacyjnym prajektam. Pavodle damovy, zaklučanaj pamiž bresckim abłvykankamam i «AjPauer», da 1 žniŭnia 2019 hoda zavod pavinien byŭ być uviedzieny ŭ ekspłuatacyju. Častkova hetuju sumu patracili na prajektnyja pracy. Aficyjna zavod tak i nie zapuścili. 14 žniŭnia abłvykankam nakiravaŭ u «AjPauer» list z patrabavańniem viarnuć hrošy.
Jany nie vykanali svaju častku damovy, tamu Respublika Biełaruś maje prava ŭ adnabakovym paradku admovicca ad svaich abaviazańniaŭ, — skazaŭ na sustrečy z praciŭnikami budaŭnictva akumulatarnaha zavoda kiraŭnik kamiteta ekanomiki abłvykankama Michaił Bacenka. — Damova skončyłasia 31 lipienia, i jaje nichto praciahvać nie budzie».
Pavodle słovaŭ Michaiła Bacenki, hrošy kampanii «AjPauer» vydzialalisia nie tolki ź inavacyjnaha fondu bresckaha abłvykankama, ale i ź Biełaruskaha inavacyjnaha fondu. Z abłasnoha inavacyjnaha fondu na akumulatarny zavod pad Brestam było vydzielena 5,7 młn rubloŭ. Hetyja hrošy brescki abłvykankam patrabuje ciapier viarnuć. Jašče 4,6 młn «AjPauer» atrymaŭ ź Biełaruskaha inavacyjnaha fondu. Pra pretenzii pa hetaj sumie pakul ničoha nieviadoma.
Pa słovach čynoŭnika, viarnuć hrošy ŭ biudžet vobłaści «AjPauer» pavinna da 14 vieraśnia. Kali hetaha nie adbudziecca, abłvykankam źvierniecca ŭ sud. Da sumy 5,7 miljona rubloŭ mohuć dadacca sumy štrafu i pieni, kali pravaachoŭnyja orhany znojduć parušeńni finansavaha zakanadaŭstva.
U razmovie sa Svabodaj Bacenka pacvierdziŭ praŭdzivaść ahučanaj aktyvistam infarmacyi. «Tak, heta praŭda, — skazaŭ čynoŭnik. — My patrabujem viarnuć sumu pamieram 5,7 miljona rubloŭ».
U kampanii «AjPauer» situacyju pakul nie kamientujuć. Sam Viktar Lemiašeŭski ciapier pad vartaj u SIZA KDB u Minsku. Pa słovach staršyni Kamiteta dziaržbiaśpieki Valera Vakulčyka, razam ź im zatrymanyja dva čynoŭniki Minpryrody.