Rasijski čempijon śvietu pa boksie čaplaŭsia ŭ samalocie da dziaŭčyny, jaho źniali z rejsu
30.07.2019 / 12:47
Čempijon śvietu pa viersii Suśvietnaj baksiorskaj arhanizacyi (WBO) u paŭciažkaj vazie rasiejec Siarhiej Kavaloŭ byŭ źniaty z samalota, jaki lacieŭ z Chalivudu (štat Fłaryda) u Łos-Andželes, z-za nieprystojnych pavodzin. Pra heta paviedamlaje partał The Athletic.
Incydent adbyŭsia 15 lipienia. Pierad uźlotam adna z pasažyrak abvinavaciła Kavalova ŭ tym, što jon schapiŭ jaje za ruku, pacałavaŭ i kinuŭ u jaje hrošy. Žančyna paskardziłasia na rasiejskaha baksiora piersanału samalota, zajaviŭšy, što adčuvaje siabie «niajomka i niebiaśpiečna». Akramia taho, pa infarmacyi vydańnia, Kavaloŭ taksama ŭstupiŭ u «lutuju sprečku» ź inšymi pasažyrami.
U vyniku 36-hadovy baksior byŭ źniaty z rejsa z farmuloŭkaj «za nieprystojnyja pavodziny». Pry hetym adznačajecca, što spartsmien nie byŭ zatrymany, rasśledavańnie pa fakcie incydentu nie pravodzicca.
Na rachunku Kavalova 33 pieramohi (28 nakaŭtam), try parazy i adna ničyja. Svoj nastupny pajadynak jon praviadzie 24 žniŭnia ŭ Čalabinsku suprać brytanca Entani Jarda.