Na praśpiekcie Niezaležnaści zamieniać słavutyja lichtary FOTA
29.07.2019 / 15:31
UP «Minharśviatło» pačało realizacyju prajekta rekanstrukcyi haradskoha aśviatleńnia centralnaj častki stalicy. Pieršy etap, jak paviedamili na pradpryjemstvie karespandentu ahienctva «Minsk-Naviny», praduhledžvaje zamienu apor i śviacilniaŭ na ŭčastku ad vuł. Kazłova da pł. Niezaležnaści.
Mnohija minčuki, asabliva jakija žyvuć u rajonie pł. Pieramohi, daŭno źviarnuli ŭvahu na ažurnyja kanstrukcyi, jakija źjavilisia jašče letaś zamiest raniejšych lichtaroŭ. Jany nahadvajuć kvietki na doŭhich ściablinach. Čatyry novyja prybory byli ŭstalavanyja ŭ paradku ekśpierymientu naŭzamien raniejšych, jakija vieraj i praŭdaj adsłužyli bolš za 60 hadoŭ. Ich, darečy, ustaloŭvali ŭ siaredzinie minułaha stahoddzia.
— Nastupnym krokam rekanstrukcyi, — adznačyŭ dyrektar UP Słavamir Hrynievič, — stanie sucelnaja zamiena sistemy aśviatleńnia pr. Niezaležnaści ad adnajmiennaj płoščy da vuł. Kazłova. Natryjevaje śviatło sydzie kančatkova, zastaniecca śviatłodyjodnaje. Staryja ž apory buduć zamienienyja na acynkavanyja, stylizavanyja hetak ža, jak i lichtary. U styli retra — pad tyja, jakija radavali voka minčan jašče ŭ 1950-ch hadach.
Pakul raboty viaducca pa adnym baku praśpiekta. Lichtary buduć dzimiravacca ŭ načny čas (źmianiać intensiŭnaść śviatła) u metach ekanomii elektraenierhii. Zaviaršyć hety etap rabot zapłanavana da kanca vieraśnia — pačatku kastryčnika.