Венесуэла разарвала дыпламатычныя і палітычныя адносіны з «фашысцкай» Калумбіяй

24.02.2019 / 07:51

Венесуэла разарвала дыпламатычныя адносіны з Калумбіяй і вышле супрацоўнікаў калумбійскага пасольства з Каракаса, заявіў Нікалас Мадура, паведамляе Reuters.

Прычынай разрыву дыпламатычных адносін Мадура назваў садзейнічанне Калумбіі апазіцыі ў дастаўцы гуманітарнай дапамогі ЗША ў Венесуэлу.

«Цярпенне вычарпана, я не магу больш трываць, мы не можам мірыцца з тым, што калумбійская тэрыторыя выкарыстоўваецца для нападаў на Венесуэлу. Па гэтай прычыне я вырашыў разарваць усе палітычныя і дыпламатычныя адносіны з фашысцкім урадам Калумбіі», — заявіў Мадура.

Паводле яго слоў, паслу і консулам прыйдзецца пакінуць Венесуэлу на працягу 24 гадзін.