Масавая вакцынацыя супраць грыпу ў Мінску пачнецца ў кастрычніку
08.09.2014 / 17:14
Масавая вакцынацыя супраць грыпу ў Мінску пачнецца ў кастрычніку. Аб гэтым паведаміла сёння на аператыўнай нарадзе ў Мінгарвыканкаме дзяржаўны санітарны ўрач сталіцы Наталля Жукава.
«У Мінску прадаўжаецца падрыхтоўка да кампаніі вакцынацыі супраць грыпу. Кіраўнікі больш як 1,8 тыс. арганізацый Мінска пацвердзілі гатоўнасць фінансавання вакцынацыі супраць гэтага захворвання сваіх супрацоўнікаў. Такім чынам, прышчэпкі зробяць амаль 152 тыс. працуючых жыхароў сталіцы. Асаблівая ўвага будзе ўдзелена работнікам сфер гандлю і будаўніцтва. Масавая вакцынацыя супраць грыпу ў Мінску пачнецца ў кастрычніку», — сказала Наталля Жукава.
Яна адзначыла, што ў горадзе прадаўжаецца работа па папярэджанні заносу і распаўсюджвання на тэрыторыі рэгіёна асабліва небяспечных інфекцый, якія маюць міжнароднае значэнне. У прыватнасці, на медыцынскі ўлік ставяць усіх, хто прыбывае з нестабільных па ліхаманцы Эбола краін. «У асноўным гэта замежныя студэнты. Усе яны знаходзяцца пад назіраннем медработнікаў на працягу 21 дня пасля прыезду», — падкрэсліла дзяржаўны санітарны ўрач сталіцы.
У бягучым годзе прышчапіць ад грыпу за кошт бюджэтных крыніц фінансавання плануецца больш за 32 працэнты жыхароў Мінска. Бясплатна прэпарат атрымаюць людзі з высокай рызыкай развіцця цяжкіх постгрыпозных ускладненняў (з хранічнымі захворваннямі сардэчна-сасудзістай, дыхальнай і эндакрыннай сістэм, асобы старэйшыя за 65 гадоў і іншыя), а таксама грамадзяне, якія маюць высокую рызыку заражэння грыпам (дзеці, медыцынскія работнікі, супрацоўнікі МНС, МУС і іншыя).
Паводле слоў спецыялістаў, дзякуючы поўнамаштабнай кампаніі па вакцынацыі апошнія два гады ў Мінску не фарміруецца эпідэмічны ўздым захваральнасці на грып. Акрамя таго, прышчэпкі даюць дадатны эканамічны эфект. Напрыклад, з лістапада 2013 года па сакавік 2014 года было папярэджана каля 42 тыс. выпадкаў захворвання на грып і да 13 тыс. выпадкаў вострых рэспіраторных інфекцый. Паводле падлікаў, на кожны ўкладзены ў вакцынацыю долар даход ад папярэджання захворванняў і страт часовай працаздольнасці складае амаль $10.