Бэці Гілпін у ролі манашкі Сімоны. Фота: Peacock
«Місіс Дэвіс» — гэта твор Тары Эрнандэс, сцэнарысткі і прадзюсаркі «Тэорыі Вялікага выбуху», і Дэймана Ліндэлафа, вядомага сюжэтнымі галаваломкамі серыялаў «Застацца ў жывых» і «Захавальнікі».
І калі Ліндэлаф — майстар у хітраспляценні грувасткіх сюжэтаў, дзе эпічная фантастыка пераплятаецца з рэалістычнай драмай, то Эрнандэс усё разбавіла камедыйнымі героямі і скетчамі быццам з «Монці Пайтана». У выніку эпізоды «Місіс Дэвіс» нагадваюць сітком з прымешкай паранаідальнай сатыры і шпіёнскай пародыі 60-х.
«Місіс Дэвіс» — новы тэхнабог
Усёмагутны штучны інтэлект (у Амерыцы яе называюць «Місіс Дэвіс», у Брытаніі — «Мама», у Італіі — «Мадонна» і гэтак далей) пракраўся ў жыццё большасці людзей на зямлі. Карыстальнікі сцвярджаюць, што гэта Місіс Дэвіс ліквідавала вайну, голад і ўсе іншыя разлады і стварыла ідэальнае грамадства, свабоднае ад сумневаў. Яе самыя паспяховыя прыхільнікі, выканаўшы патрэбную колькасць заданняў, зарабляюць анёльскія крылы, бачныя праз дадатак AR на тэлефоне. Па сутнасці, яна тэхнабог. І здаецца, амаль ніхто не разумее, наколькі жудасна тое, што мільярды людзей перадалі ключы ад свайго жыцця таямнічаму штучнаму інтэлекту без яснага паходжання, пра мэты якога нічога не вядома.
Аднак ёсць у Місіс Дэвіс і праціўнікі — напрыклад, манашка Сімона, у якой са штучным інтэлектам звязана адна асабістая гісторыя, пасля якой дзяўчына на дух яго не пераносіць. Сімона жыве ў старым манастыры на ўскраіне горада і шчаслівая весці пустэльніцкі лад жыцця, варыць клубнічнае варэнне і не мець адносін з Місіс Дэвіс. Аднак надыходзіць дзень, калі алгарытм робіць ёй прапанову занадта прывабную, каб адмовіцца: калі Сімона пагодзіцца выканаць заданне Місіс Дэвіс, тая выканае адзінае жаданне Сімоны — адключыць штучны інтэлект назаўжды.
Бэці Гілпін і Кім Хатарн. Фота: Peacock
На шчасце, Сімона не будзе адна — адусюль з'явяцца саюзнікі. Сярод яе памочнікаў таямнічы Джэй (Эндзі МакКуін) — ці то яе ўяўны муж, ці то метафара Хрыста, які не толькі корміць Сімону смачным фалафелем, але і перадае ёй розныя паперы з «заданнямі», і называе імёны людзей, якіх трэба сцерагчыся.
А таксама былы хлопец Уайлі (Джэйк МакДорман), які ўзначаліў рух супраціву штучнаму інтэлекту і мае ўражальную колькасць тэхналагічных рэсурсаў, каб змагацца з Місіс Дэвіс.
Серыял, не падобны ні да якога іншага
Грузавік, поўны варэння, выбухае пасля таго, як у яго трапляюць сонечныя промні з гіганцкай лупы, пасля чаго каўбой, манашка і яе маці адпраўляюцца на пошукі Святога Грааля. На шляху яны сутыкаюцца з таемным грамадствам ваяўнічых жанчын-банкіраў, катом Шродзінгера, святаром, які збірае красоўкі, і прэм'ер-міністрам Іспаніі. Гэта толькі некаторыя фрагменты сюжэта, які непрадказальны кожную секунду.
Джэйк Макдорман у ролі Вайлі, Бэці Гілпін у ролі Сімоны. Фота: Peacock
Серыял парадзіруе мноства фільмаў — ад вестэрнаў да рэлігійных прыпавесцяў. Акрамя таго, ён не баіцца збіваць з панталыку і шакаваць гледачоў, калі пераходзіць ад бесшабашнай весялосці да змрочных, складаных разваг.
Такая какафонія магла б лёгка рассыпацца, але дапамагае тое, што ў цэнтры выдатная актрыса, якая звязвае ўсё ў суцэльнае адзінства. Яе рэплікі заўсёды здзіўляюць, і яна можа перайсці ад бязлітаснага сарказму да шчырых слёз у імгненне вока. У серыяле яе заклікаюць рабіць гэтыя хуткія эмацыйныя зрухі зноў і зноў — і гэта заўсёды выглядае неймаверна. Сімона — камічны, дзёрзкі і іранічны персанаж, чыя бесклапотная адчужанасць хавае глыбокае пачуццё веры і мэтанакіраванасць, а таксама цяжкую дзіцячую траўму.
Джэйк Макдорман у ролі Вайлі, Бэці Гілпін у ролі Сімоны. Фота: Peacock
Вера супраць навукі і іншыя тэмы
Безумоўна, фільм «Місіс Дэвіс» зняты на злобу дня, і пры стварэнні серыяла каманда нават распрацавала спецыяльны алгарытм, каб прыдумаць назвы эпізодаў шоу — у выніку серыі атрымалі такія назвы, як «Вялікі Гэтсбі 2001: Касмічная адысея», «Маці Міласэрнасці: Кліч каня» і «Выдатнае месца, дзе можна выпіць, каб атрымаць кантроль над сваім напоем», згенераваныя машынай.
Серыял падымае тэмы веры і навукі, свабоды волі («Калі вы думаеце, што выбіраеце, але гэта ўжо абрана за вас») і кампрамісаў, звязаных з перадачай рашэнняў, якія прымае чалавечы мозг, машыне. Ён падштурхоўвае да разважанняў і пераасэнсавання працэсаў, што адбываюцца ў сучасным свеце.
Таксама закранаюцца і многія пытанні, не звязаныя з тэхналогіямі: пра веру, складанасці адносінаў паміж маці і дачкой (Сімона і яе маці, Сімона і Місіс Дэвіс, Клара і Матыльда), пра тое, што такое мужнасць (мужчынскія персанажы — члены руху супраціву — апантаныя «брутальнай мускуліннасцю» і страхам падацца баязлівымі). З бліскучымі інтанацыямі шоу высмейвае заганы спажывецкага таварыства.
Нягледзячы на цяжкавагавасць і шматслойнасць названых тэм, шоу застаецца камедыйным і не абцяжарвае гледача празмернай сур’ёзнасцю.
Яшчэ са свету кіно:
«Тры мушкецёры: Д’Артаньян»: бадзёрая экранізацыя з прыгодніцкім духам і зорным акцёрскім складам
У Расіі знялі рэмейк беларускага фільма «У жніўні 44-га» Міхаіла Пташука
«Беларусьфільм» пачаў здымкі блокбастара паводле рамана Караткевіча
