Генерал-палкоўнік Аляксандр Лапін прызначаны начальнікам Галоўнага штаба сухапутных войскаў, сцвярджае РБК са спасылкай на крыніцу ў Мінабароны Расеі. Афіцыйна аб прызначэнні Лапіна на новую пасаду не паведамлялася. Прыхільнікі вайны супраць Украіны абвінавачвалі яго ў ваенных памылках.
Лапін быў камандуючым Цэнтральнай ваеннай акругай Расіі, а падчас ўварвання ва Украіну стаў камандаваць групай «Цэнтр». 4 ліпеня прэзідэнт Уладзімір Пуцін прысвоіў яму званне Героя Расіі — за «мужнасць і гераізм». Расейскія ўлады не ўдакладнялі, чым менавіта вызначыўся генерал-палкоўнік на вайне супраць Украіны.
Увосень ягонае прозвішча перастала фігураваць у вайсковых зводках — тады на першы план выйшаў камандуючы аб'яднанай групоўкай расійскіх войскаў Сяргей Суравікін. А Лапін трапіў пад агонь крытыкі з боку галоўных прыхільнікаў вайны — Рамзана Кадырава і Яўгена Прыгожына.
Менавіта на Лапіна яны і некаторыя ваенныя блогеры ўскладалі адказнасць за няўдачы на фронце. Кадыраў называў генерала «бездарам» і абвінавачваў у адступленні ад горада Лімана.
Лапін прабыў камандуючым групоўкай «Цэнтр» да канца кастрычніка, пасля чаго расійскія СМІ паведамілі пра яго сыход. У лістападзе было афіцыйна абвешчана, што на пасадзе камандуючага войскамі Цэнтральнай ваеннай акругі яго змяніў генерал-маёр Аляксандр Лінькоў.
У генерала і да Украіны быў вайсковы досвед-у 2017 годзе 59-гадовы Лапін быў начальнікам штаба групоўкі расійскіх войскаў у Сірыі, у лістападзе таго ж года ўзначаліў камандаванне Цэнтральнай вайсковай акругі, а з кастрычніка 2018 года да студзеня 2019 года кіраваў групоўкай войскаў у Сірыі, нагадвае РБК.
