Фота: vecteezy.com
Персаналізаваная прышчэпка ад меланомы кампаніі Moderna дапамагла прадухіліць рэцыдыў раку скуры на прамежкавай фазе выпрабаванняў. Камбінацыя вакцыны з супрацьракавым імунатэрапеўтычным прэпаратам Keytruda ад кампаніі Merck знізіла рызыку рэцыдыву амаль што ўдвая, піша Wall Street Journal.
У даследаванні ўдзельнічалі 150 добраахвотнікаў, якім да гэтага выдалілі меланому хірургічным шляхам. Частка з іх атрымала да дзевяці доз вакцыны разам з імунатэрапеўтычным прэпаратам, частка — толькі прэпарат. У тых, хто прайшоў праз вакцынацыю, рызыка рэцыдыву ці смерці была на 44% меншая, чым у другой катэгорыі.
Гэтыя вынікі маюць статыстычную значнасць, але ж не былі правераныя незалежнымі вучонымі. Яны даюць надзею на з’яўленне новага класа вакцын — такіх, што дазволяць не толькі прадухіляць хваробы, як звычайныя прышчэпкі, але і лячыць іх.
Прышчэпка супраць меланомы заснаваная на тэхналогіі мРНК (ці іРНК) — той жа самай, што дала падмурак і для стварэння супрацькавіднай вакцыны ад Moderna. Звычайныя вакцыны прадугледжваюць увядзенне ў арганізм аслабленага ці інактываванага ўзбуджальніка інфекцыі. Прышчэпкі ж на базе мРНК віруса вучаць клеткі выпрацоўваць бялок, які запускае імунную рэакцыю ў выпадку заражэння. Імунная сістэма пазнае гэты бялок і пачынае выпрацоўваць антыцелы, якія могуць змагацца з вірусам у выпадку, калі прышчэплены чалавек ім заразіцца.
Эліаў Бар, кіраўнік аддзела міжнароднага клінічнага развіцця і галоўны медыцынскі дырэктар Merck, распавёў у інтэрв’ю, што гэта першы раз, калі навукоўцы бачаць сапраўды моцную рэакцыю на супрацьракавую вакцыну: «Першы раз мы можам паказаць, што ліквідацыя тармазоў імуннай рэакцыі, якую забяспечвае Keytruda, плюс незвычайна добрая вакцына даюць насамрэч выдатны імунны адказ».
Чытайце таксама:
Ці можна выпіваць, калі вы прышчапіліся ад кавіду?
Беларускую вакцыну ад кавіду пачнуць выпускаць у студзені, але патрэба ў ёй ужо мінула
Кіраўнік Акадэміі навук: Беларусь будзе выпускаць вакцыны, «адаптаваныя для нашых людзей»
