Пра гэта паведамілі гомельскаму выданню «Флагшток» дзве не звязаныя паміж сабой крыніцы.
Віталь Панчанка быў старажылам сярод кіраўнікоў раённых адміністрацый Гомельскай вобласці. Пасля некалькіх гадоў працы ў сельскагаспадарчых арганізацыях, ён узначаліў Рэчыцкі райвыканкам яшчэ ў лістападзе 2012 года.
У кар'еры Віталя Панчанкі на пасадзе кіраўніка маецца вельмі характэрны выпадак. 16 жніўня 2020 года ён быў адным з раённых кіраўнікоў, які выйшаў да народа, які пратэставаў супраць фальсіфікацый на выбарах і збіцця грамадзян.
Аднак дыялогу не атрымалася. Ухіленне старшыні райвыканкама ад адказаў на прамыя пытанні абурыла прысутных. Урэшце Панчанка заявіў, што гатовы пакінуць сваю пасаду: «Я тут працую не першы год. Калі я нешта раблю не так, я ніколі за ўладу не трымаўся і не трымаюся».
У адказ на прапанову напісаць заяву аб адстаўцы Панчанка адказаў: «Добра, я вас пачуў, мы вызначымся».
Аднак ён сышоў у адстаўку толькі праз два гады. Але цяпер ужо разам з крымінальнай справай. Як распавёў «Флагштоку» чалавек, знаёмы з сітуацыяй, экс-старшыні райвыканкама інкрымінуюць нястачу свіней і буйной рагатай жывёлы ў гаспадарках Рэчыцкага раёна.
