Шэйх Халіфа нарадзіўся ў 1948 годзе. Ён быў шаснаццатым эмірам Абу-Дабі і другім прэзідэнтам Аб'яднаных Арабскіх Эміратаў, заняўшы гэты пост у 2004 годзе пасля свайго бацькі, шэйха Зайд бен Султана, які заснаваў ААЭ.
Падчас кіравання шэйха Халіфы у ААЭ быў праведзены шэраг дэмакратычных зменаў. Менавіта ў яго гонар быў названы пабудаваны ў 2010 годзе самы высокі будынак у свеце «Бурдж Халіфа» ў Дубаі. Ён таксама быў адным з найбагацейшых людзей свету.
Пасля Халіфы кіраўніком ААЭ павінен стаць ягоны малодшы брат, Мухамед бен Зейд, які з 2014 года, калі прэзідэнт перанёс інсульт, фактычна кіраваў краінай.
Аб'яднаныя Арабскія Эміраты — гэта федэрацыя сямі эміратаў, кожны з якіх з'яўляецца абсалютнай манархіяй.
Прэзідэнт, згодна з Канстытуцыяй, з'яўляецца другім па значнасці органам улады пасля Вярхоўнай Рады, якая складаецца з кіраўнікоў усіх эміратаў. Прэзідэнт абіраецца тэрмінам на пяць гадоў, ён узначальвае Раду, прызначае прэм'ер-міністра, дыпламатаў, выпускае законы і ўказы, зацвярджае смяротныя прысуды і прадстаўляе краіну за мяжой.
Фактычна, аднак, выбарнасць прэзідэнта ў ААЭ фармальная, ім амаль аўтаматычна робіцца эмір найбольшага і наймацнейшага эмірата Абу-Дабі. Таму гэтая пасада ў краіне дэ-факта з'яўляецца спадчыннай.
Міністэрства па справах прэзідэнта ў сувязі са смерцю шэйха Халіфы абвясціла ў ААЭ афіцыйны жалобу. На працягу 40 дзён будуць прыспушчаныя Сцягі, праца ва ўсіх органах улады і ў прыватным сектары будзе спыненая на тры дні — з суботы па панядзелак.
