Паводле іх інфармацыі, Пуцін, які сур'ёзна разглядаў магчымасць заключэння мірнага пагаднення з Украінай пасля таго, як у сакавіку Расія пацярпела паразу падчас наступу на поўначы краіны, сказаў людзям, якія ўдзельнічаюць у спробах пакласці канец канфлікту, што не бачыць перспектыў для ўрэгулявання.
«Пуцін шчыра верыць у тую лухту, якую ён чуе па [расійскім] тэлебачанні, і хоча выйграць маштабна», — сказаў чалавек, які ведае пра ход перамоваў.
Масква і Кіеў узгаднілі першы праект мірнага пагаднення на сустрэчы ў Стамбуле ў канцы сакавіка, але перамовы зайшлі ў тупік пасля таго, як прэзідэнт Украіны Уладзімір Зяленскі абвінаваціў Расію ў здзяйсненні ваенных злачынстваў супраць мірных жыхароў у Бучы і Марыупалі. Пуцін жа быў у лютасці пасля таго, як Украіна патапіла крэйсер «Масква», сказалі FT адразу дзве крыніцы.
«Была надзея на здзелку. Пуцін хадзіў туды-сюды. Яму трэба знайсці спосаб выйсці з гэтай сітуацыі пераможцам», — сказаў адзін з суразмоўцаў. Пасля таго, як затанула «Масква», Пуцін быў супраць падпісання чаго-небудзь. «Пасля «Масквы» ён не выглядае пераможцам, таму што гэта было зневажальна», — дадаў суразмоўца.
Украінскія і заходнія чыноўнікі заўсёды сумняваліся ў прыхільнасці Пуціна да мірных перамоваў, сцвярджаючы, што гэта толькі спосаб выйграць час для далейшага наступу, адзначае выданне.
Расійскі прэзідэнт, падобна, прытрымліваецца скажонага погляду на вайну, выкладзенага яго генераламі і паказанага па расійскім тэлебачанні, сказалі інфармаваныя крыніцы. Па іх словах, Пуцін настойвае, нягледзячы на ўсе доказы зваротнага, што расійскія войскі не выбіралі ў якасці мішэні цывільных асоб.
Крыніца FT таксама сказала, што Уладзімір Пуцін пазбягае асабістай сустрэчы з Уладзімірам Зяленскім «усімі сіламі»: «Ён хоча, каб усё было вырашана да іх асабістай сустрэчы».
