Ні адзін з іранцаў, вызваленых з амерыканскіх турмаў ў ходзе абмену зняволенымі, не захацеў вяртацца ў Іран.

Пра гэта паведамляе ABC News са спасылкай на чыноўнікаў, знаёмых з ходам перамоваў.

Бакі дамовіліся, што накіруюць выпушчаных зняволеных у Жэневу. Швейцарыя з'яўляецца нейтральнай краінай, якая на працягу многіх гадоў дзейнічала як дыпламатычны пасярэднік паміж ЗША і Іранам.

У нядзелю 17 студзеня з вайсковай базы ў Тэгеране узляцеў швейцарскі самалёт, на борце якога былі трое вызваленых вязняў-амерыканцаў — журналіст Джэйсан Резаян, былы марскі пехацінец Амір Хекмаці і хрысціянскі пастар Саед Абедзіні.

У той жа дзень з усходняга ўзбярэжжа ЗША павінен быў адправіцца самалёт з сямю ірана-амерыканцамі, выпушчанымі з турмы. Але ні адзін з іх не сеў на борт. Сам самалёт узляцеў, бо ў любым разе павінен быў выканаць рэйс, каб перавезці вызваленых з Ірана з Жэневы ў ЗША.

Шэсць з сямі памілаваных — асобы з падвойным грамадзянствам ЗША і Ірана. Яны былі асуджаныя альбо абвінавачваліся ў здзяйсненні злачынстваў, звязаных з продажам высокатэхналагічнага абсталявання ў Іран у абыход эмбарга. 

У сваю чаргу, адзін з пяці грамадзян ЗША, вызваленых іранскімі ўладамі, Насратула Хасраві-Рудсары, вырашыў не пакідаць Іран.

Яшчэ адзін амерыканскі студэнт, раней затрыманы ў Іране, пасля таго як быў выпушчаны, паляцеў дадому на камерцыйным рэйсе.

Позна ўвечары ў той жа дзень ЗША і ЕС абвясцілі аб зняцці з Ірана санкцый, накладзеных з-за ядзернай праграмы Тэгерана. Рашэнне было прынята на падставе заключэння МАГАТЭ, якое пацвердзіла факт выканання ўсіх патрабаванняў ядзернай здзелкі.

Клас
0
Панылы сорам
0
Ха-ха
0
Ого
0
Сумна
0
Абуральна
0