Прынамсі 700 тысяч бразільцаў выйшлі на дэманстрацыі ў 218 гарадах краіны супраць палітыкі ўрада прэзідэнта Дылмы Русэф, паведамляе мясцовае выданне Globo. Па дадзеных саміх пратэстоўцаў, на вуліцы выйшлі паўтара мільёна чалавек.
Акцыі пратэсту прайшлі ў 24 з 26 штатаў краіны, а найбольш шматлікая дэманстрацыя адбылася ў Сан-Паўлу — там на вуліцы выйшлі больш за 270 тысяч чалавек. Дэманстрацыі прайшлі мірна і без сутыкненняў з паліцыяй.
Месяцам раней серыя акцый пратэсту па ўсёй краіне прыцягнула пад свае лозунгі больш як 2,4 млн бразільцаў. Тады ў іх прынялі ўдзел жыхары 252 гарадоў.
Арганізатарам пратэстных выступленняў зноў стаў «Рух за свабодную Бразілію», што вырас з «Руху за бясплатны праезд», які правёў мільённыя дэманстрацыі напярэдадні правядзення Чэмпіянату свету па футболе.
Апазіцыя абвінавачвае Русэф і яе ўрад у правядзенні неэфектыўнай сацыяльна-эканамічнай палітыкі на фоне паўсюднай карупцыі ў шэрагах дзяржаўнай нафтавай кампаніі Petrobras і кіраўніцтве кіроўнай «Партыі працоўных». Многія з актывістаў патрабавалі пачатку працэдуры адстаўкі прэзідэнта, якая пакуль не з'яўляецца фігурантам гучнага расследавання.
