Агенцтва стратэгічнага і эканамічнага развіцця склала рэйтынг перспектыўных і крэатыўных маладых прадпрымальнікаў Беларусі, якія развіваюць праекты ў розных індустрыях і ў розных краінах.
Пры размеркаванні месцаў у Топ-30 за аснову былі ўзятыя рэальныя дасягненні ўдзельнікаў, улічаныя перспектывы росту і капіталізацыі іх кампаніі (кампаній) у будучыні. Таксама ацэньваліся магчымасці маштабавання бізнэсаў на глабальных рынках.
У рэйтынг уключаны:
1. Бізнэсмены, не старэйшыя за 30 гадоў (уключна) па стане на 1 сакавіка 2015 года.
2. Толькі грамадзяне Беларусі.
3. Бізнэсмены, якія працуюць за межамі Беларусі альбо кампанія (кампаніі) якіх зарэгістраваныя за межамі нашай краіны.
4. Прадстаўнікі сферы культуры, якія маюць перспектывы і магчымасці атрымання высокіх ганарараў і манетызацыі вынікаў сваёй працы ў будучыні.
1 месца
Андрэй Шымановіч
Узрост: 27
Месца жыхарства: Лондан
Сфера дзейнасці: Венчурныя інвестыцыі
Пасля заканчэння Queen Mary University of London Андрэй далучыўся да каманды інвестыцыйнага буціка Bowline Capital Partners. Досвед, атрыманы ў інвестыцыйным банкінгу, адкрыў яму шлях да венчурнага капіталізму.
Сёння Андрэй — адзін з сузаснавальнікаў венчурнага фонду WeRocks з офісамі ў Лондане і Пала-Альта. У партфелі фонду ўжо 7 амбіцыйных стартапаў, арыентаваных на глабальны рынак. На цяперашні момант WeRocks заканчвае фарміраванне чарговага венчурнага фонду з аб'ёмам інвестыцый $250 млн.
Андрэй часта прыязджае на радзіму. Актыўна цікавіцца перспектыўнымі стартапам ў Беларусі, якія можна маштабіраваць.
2 месца
Пётр Скаромны
Узрост: 30
Месца жыхарства: Мінск
Сфера дзейнасці: ІТ
Пётр — сузаснавальнік і дырэктар па стратэгічным развіцці распрацоўшчыка мабільных дадаткаў Аpalon. За час працы (з 2007) кампанія выпусціла больш за 50 ІТ-прадуктаў. Агульны аб'ём іх усталёвак склаў 200+ млн.
Яе дадаткі (Pimp Your Screen, Weather Live, Calculator Pro for iPad і інш.) неаднаразова атрымлівалі ўзнагароды на розных тэматычных рэсурсах. У мінулым годзе кампанія некалькі разоў ўваходзіла ў штомесячны Топ-10 распрацоўшчыкаў прадуктаў для App Store па версіі App Annie, атрымала статус топавага распрацоўшчыка ў Google Play.
Па выніках 2014 Apalon увайшоў у першую дзясятку распрацоўшчыкаў ПВТ па аб'ёме выручкі.
У мінулым годзе адбылася адна з найбольш знакавых здзелак M&A на беларускім рынку: Apalon набыла амерыканская інтэрнэт-кампанія InterActiveCorp (IAC). У яе партфель уключаны 150+ брэндаў і прадуктаў, якімі карыстаюцца больш чым у 100 краінах свету.
Сума ўгоды не раскрываецца.
3 месца
Антон Ярашук
Узрост: 29
Месца жыхарства: Мінск
Сфера дзейнасці: ІТ
Антон — заснавальнік кампаніі Vizor Interactive, якая з'яўляецца вядучым беларускім распрацоўшчыкам і выдаўцом шматкарыстальніцкіх гульняў для браўзэра, сацыяльных сетак і мабільных платформаў. Сярод найбольш папулярных гульняў кампаніі — «Зомбі ферма», «Кландайк: зніклая экспедыцыя», «Вернасць: рыцары і прынцэсы».
Гульня «Зомбі ферма» выйшла ў свет у снежні 2010 і праз 3 месяцы пасля рэлізу ўвайшла ў Топ-5 гульнявых дадаткаў сацыяльнай сеткі «Укантакце». Цяпер у «Зомбі ферму» граюць мільёны людзей ва ўсім свеце.
4 месца
Павел Гільман
Узрост: 27
Месца жыхарства: Лондан
Сфера дзейнасці: Біятэхналогіі, нерухомасць, шоу-бізнэс
Павел — шматпрофільны бізнэсмен з лонданскай прапіскай. Ён паспяхова кіруе групай кампаній на брытанскім рынку нерухомасці. Яго рыэлтарскай агенцтва Ready-flats Ltd асабліва папулярнае сярод рускамоўнага насельніцтва Лондана. Стратэгія развіцця бізнесу — адкрыццё прадстаўніцтваў ва ўсіх буйных гарадах свету (першым стаў Рым). Таксама група кампаній займаецца рэканструкцыяй і будаўніцтвам жылых шматпавярховых і прыватных дамоў на тэрыторыі Вялікабрытаніі.
Павел актыўна інвестуе ў біятэхналогіі. Адзін з яго актываў — Kaddish Ltd, міжнародная навукова-тэхналагічная кампанія, якая спецыялізуецца на агракансалтынгу і ўзбагачэнні харчовых прадуктаў і кармоў для сельскагаспадарчых жывёл. У 2013 годзе была зас наснаваная кампанія Stoller Ukraine ў Кіеве, якая аказвае паслугі па індывідуальнай распрацоўцы тэхналогій павелічэння ўраджайнасці сельскагаспадарчых культур ва Украіне.
Акрамя таго, Павел з'яўляецца заснавальнікам медыя-прадакшн кампаніі Hilberg Limited, а таксама членам апякунскай рады і журы Лігі КВЗ і конкурсу прыгажосці Міс СССР у Вялікабрытаніі.
5 месца
Мікіта Мікада
Узрост: 28
Месца жыхарства: Сан-Францыска
Сфера дзейнасці: ІT
Мікіта — сузаснавальнік стартапа PandaDoc і кампаніі Quote Roller. У 2013 годзе яго стартап PandaDoc прыцягнуў $655 тыс. Ад Kima Ventures, Altair Capital, Fabrice Grinda і шэрагу іншых інвестараў. У цяперашні час PandaDoc знаходзіцца ў фазе імклівага росту.
«Мы выбіралі не краіну — мы выбіралі менавіта Сіліконавую даліну. Гэта Мека ўсіх ІТ-кампаній. Асабіста мне тут хутчэй вучыцца і знаходзіць тое, што ўжо зрабілі, а не вынаходзіць нанова. Жонка адразу пагадзілася», — казаў Мікіта пасля пераезду разам з камандай і жонкай у Сан-Францыска.
6 месца
Уладзімір Халязнікаў
Узрост: 30
Месца жыхарства: Масква
Сфера дзейнасці: ІT
У сакавіку мінулага года генеральным дырэктарам аднаго з міжнародных інтэрнэт-холдынгаў KupiVIP быў прызначаны Уладзімір Халязнікаў, які змяніў на гэтай пасадзе заснавальніка Оскара Хартмана. Уладзімір Халязнікаў з'яўляецца адным з сузаснавальнікаў кампаніі. З 2012 года ён займаў пасаду аперацыйнага дырэктара.
KupiVIP цяпер складаецца з шопінг-клуба KupiVIP.ru, анлайн-буціка KupiLUXE.ru, інтэрнэт-крамы ShopTime.ru, падраздзялення электроннай камерцыі KupiVIP E-Commerce Services, мадэльнага агенцтва NEW ONE Model Management і партала аб модзе Fashion Stylist. Прадстаўніцтвы кампаніі адкрыты ў Лос-Анджэлесе, Берліне, Мілане і Парыжы.
7 месца
Кірыл Чыкеюк
Узрост: 28
Месца жыхарства: Лондан
Сфера дзейнасці: Інавацыйная рэклама
Кірыл і яго партнёр Арцём Ставенка ў 2012 годзе заснавалі ў Вялікабрытаніі стартап Kino-mo, які аказвае паслугі па размяшчэнні інавацыйнай рэкламы на колах ровара. Першапачаткова праект быў заснаваны на тэхнічным рашэнні распрацоўшчыкаў з ЗША, але за год дапрацоўкі ён ператварыўся ў новы прадукт, аналагаў якому няма ў свеце.
Са сваім праектам хлопцы сталі пераможцамі вядомага тэлешоў «Dragons 'Den» на BBС, у рамках якога члены журы — буйныя інвестары і бізнес-анёлы, кантактуюць з маладымі вынаходнікамі. Затым прымаецца рашэнне, ці варта ўкладаць у праекты грошы. Але пасля заснавальнікі перспектыўнага стартапа адмовіліся ад £90 тыс. на карысць самастойнага развіцця.
Kino-mo стаў пераможцам многіх конкурсаў і прэмій у Вялікабрытаніі (Shell LiveWire Award, Bright Ideas Award, Cambridge University Entrepreneurs Award), а Кірыл нядаўна абараніў дысертацыю ў Оксфардскім універсітэце і стаў доктарам навук.
8 месца
Аляксей Курэц
Узрост: 29
Месца жыхарства: Мінск
Сфера дзейнасці: ІT
Аляксей Курэц — заснавальнік і дырэктар ТАА «ТурбаХэдс». Яшчэ да заснавання свайго галоўнага праекта assistant.by Аляксей запусціў цэлы шэраг стартапаў, арыентаваных на беларускі рынак: Obana.By, Yees.By, Udivi.By. У 2009 Obana.By стаў самым папулярнымі інтэрнэт-аўкцыёнам Беларусі.
Першапачаткова assistant.by быў таксама арыентаваны на беларускі рынак, але пасля інвестыцый расейскай кампаніі «1С» у 2012 была выпушчаная першая версія анлайн-бухгалтэрыі для расійскага рынка пад назвай EasyBooker, пазней пераназваная ў Асістэнт Про. Наступным імпульсам для развіцця assistant.by стала ўваходжанне ў склад заснавальнікаў венчурнага фонду Softline Venture Partners і аднаго з найбуйнейшых воблачных правайдараў у СНД кампаніі ActiveCloud.
Сёння ў камандзе assisent.by працуе 30 чалавек, а паслугамі сэрвісу карыстаюцца тысячы прадпрымальнікаў па ўсёй краіне.
9 месца
Аляксандр Журба
Узрост: 29
Месца жыхарства: Масква
Сфера дзейнасці: Венчурныя інвестыцыі
Аляксандр Журба нарадзіўся ў Полацку, дзе і зрабіў першыя крокі ў інтэрнэт-бізнэсе. У 2004—2006 ён развіваў інфармацыйна-аналітычны сайт, прысвечаны Полацку і Наваполацку. Пасля пераезду ў Маскву ў 2006 годзе Аляксандр папрацаваў у шэрагу вядомых кампаній: студыі Арцемія Лебедзева, крэатыўным агенцтве Lebrand, медыяхолдынгу РБК.
Пасля ў розныя перыяды Аляксандр з'яўляўся сузаснавальнікам інтэрнэт-холдынга «Ройбер», інвестыцыйнай кампаніі Modernus Capital Partners, бізнэс-акселератара TexDrive, венчурнага фонду Genezis Capital.
У цяперашні час Аляксандр развівае свой новы праект, звязаны з венчурным інвестыцыямі. Кампанія Sapfir Capital мае цікавую канцэпцыю: яна дапамагае стартапам ў пошуку інвестыцый і продажы бізнэсу, а зарабляе на камісіі, якая спаганяецца пасля афармлення здзелак.
10 месца
Улад Кухарчук
Узрост: 28
Месца жыхарства: Сан-Францыска
Сфера дзейнасці: Шоу-бізнэс
Улад Кухарчук — заснавальнік і лідар поп-рок гурту Kiwi Time, які базуецца ў Каліфорніі. Практычна ўся каманда родам з Бярозы Брэсцкай вобласці. Хлопцы рабілі першыя крокі ў музыцы ў Беларусі, а пасля пераезду адзін за адным у Сан-Францыска аб'ядналіся і ўтварылі ў 2011 годзе групу Kiwi Time.
У 2013 годзе расійскі бізнесмэн Юрый Петушкоў спецыяльна пад гурт стварыў музычны лэйбл Granted Access Inc. і актыўна інвесціруе сродкі ў прасоўванне гурту. Kiwi Time стаў уладальнікам шэрагу прэмій у музычнай індустрыі ЗША, у прыватнасці, Stoneski Battle of the Bands і ArtRockX band competition.
11 месца
Сяргей Дубаграеў
Узрост: 26
Месца жыхарства: Александрыя (штат Віргінія), ЗША
Сфера дзейнасці: ІT
Сяргей — заснавальнік стартапа Pinxter для моднікаў. Pinxter — сацыяльная сетка, дзе карыстальнікі могуць дзяліцца сваімі вобразамі і ацэньваць гардэроб сяброў, незнаёмых людзей або зорак. У дадатку можна не толькі параіцца, варта купляць сукенку і ці падыходзіць вам новая прычоска, але і натхняцца ідэямі для фарміравання ўласнага стылю. Кампанія таксама дае гатовыя рашэнні, злучаючы брэнды і спажыўцоў шляхам аналітыкі, адсочваючы трэнды і спажывецкія інтарэсы.
Аўдыторыя сацыяльнай сеткі налічвае больш за 300 тысяч карыстальнікаў, большую частку з якіх складаюць дзяўчаты ад 15 да 22 гадоў.
12 месца
Дзмітрый Мацкевіч
Узрост: 30
Месца жыхарства: Масква
Сфера дзейнасці: ІT
Дзмітрый, неаднаразовы пераможца рэспубліканскай алімпіяды па фізіцы, у 2002 годзе паехаў вучыцца ў МФТІ. Фізікам ён не стаў, але стаў венчурным прадпрымальнікам. Папрацаваўшы аналітыкам у Accenture і кіраўніком аддзела CRM і спецыяльных праектаў у Wikimart, заснаваў два ўласныя стартапы — flocktory.com і 1minute.ru.
Flocktory.com — сістэма реферальнага маркетынгу, якая дазваляе ўладальнікам інтэрнэт-крам або рэсурсаў матываваць сваіх бягучых пакупнікоў рэкамендаваць яго сваім сябрам.
1minute.ru — праект, які дазваляе займацца дабрачыннасцю, не адыходзячы ад камп'ютара. Карыстальнікі могуць здзяйсняць розныя рэкламныя дзеянні, а сабраныя такім чынам сродкі размяркоўваць паміж дабрачыннымі фондамі. Стартап стаў удзельнікам і прызёрам наступных конкурсаў: БІТ, HSE {10K}, Кубак Технавацый, Imagine Cup.
13 месца
Алег Цягуноў
Узрост: 30
Месца жыхарства: Мінск
Сфера дзейнасці: ІТ
Алег — сузаснавальнік і кіраўнік ActiveCloud. У 2003 заснаваў кампанію Active Technologies, якая стала правайдарам паслуг хостынгу ў Беларусі. У 2007 годзе заснаваў кампанію Invelio, якая займаецца распрацоўкай заказнога праграмнага забеспячэння ў розных сферах: аўтаматызацыя хостынгу, e-commerce, білінгавай сістэмы, CRM, CMS, ПА для букмекерскіх кампаній і інш.
У 2010 разам са сваім праектам прыйшоў у Softline. Так паўстаў брэнд ActiveCloud, які прапануе воблачныя рашэнні, хостынг і ІТ-кансалтынг ў СНД і шэрагу замежных краін. У 2013 стаў суарганізатарам бізнэс-інкубатара TurboHeads, якія спецыялізуюцца на стварэнні SaaS-прадуктаў.
14 месца
Бахрам Ісмаілаў
Узрост: 22
Месца жыхарства: Мінск
Сфера дзейнасці: ІT
Бахрам пачаў сваю кар'еру ў ІТ у якасці праект-мэнэджара ў амерыканскім стартапе MediBook, які працуе з медыцынскімі ўстановамі Каліфорніі.
У 2014 годзе сумесна з партнёрамі пачаў працу над стартапам vnutri.by і заснаваў кампанію Global Indoor Technology Ltd. Кампанія займаецца развіццём сінэргіі мабільнага дадатка і софту, якія павінны вырашыць праблему навігацыі ўнутры гандлёвых цэнтраў для карыстальнікаў, збору маркетынгавай інфармацыі і вымярэння канверсіі для афлайн-крам.
На дадзены момант праект прыцягнуў інвестыцыі расійскіх інвестараў.
Бахрам з'яўляецца прызёрам Mentor Day — 2014.
Каманда маладых ІТ-распрацоўшчыкаў, якую ўзначальвае Бахрам, — галоўныя героі нашага спецпраект «Стартап на мільярд».
15 месца
Яўген Пальчэўскі
Узрост: 28
Месца жыхарства: Мінск
Сфера дзейнасці: ІT
Яўген у 2009 годзе ўжо паспеў прадаць сваю першую кампанію. У 2009—2011 кіраваў распрацоўкай праекта па вэб-аналітыцы з месячным наведваннем ў 30 млн карыстальнікаў. З 2011 займаецца развіццём прыватных аналітычных вэб-сэрвісаў, якія дасягнулі топ-1000 па наведваннях у свеце — аўдыторыя 7 млн наведвальнікаў у месяц. Зараз развівае і інвесціруе ў шэраг кампаній у сегменце B2B.
16 месца
Cаша Філіпенка
Узрост: 30
Месца жыхарства: Масква
Сфера дзейнасці: Літаратура, журналістыка
Аляксандр нарадзіўся ў Мінску, скончыў ліцэй мастацтваў ім. Ахрэмчыка, пазней пераехаў у Санкт-Пецярбург, дзе скончыў філалагічны факультэт СПБГУ. Працаваў на Першым канале тэлебачання, у тым ліку пісаў сцэнары да праграм «Пражэктарпэрысхілтан», YestardayLivе і інш. Затым перайшоў у рэдакцыю тэлеканала «Дождж».
У 2014 годзе за свой раман «Былы сын» стаў лаўрэатам першай прэміі ў намінацыі «Буйная проза» міжнароднай прэстыжнай літаратурнай «Рускай прэміі». Улічваючы добры старт у маладым узросце і памеры ганарараў папулярных расійскіх пісьменнікаў, у Філіпенкі вельмі перспектыўная будучыня.
17 месца
Андрэй Гусараў
Узрост: 29
Месца жыхарства: Мінск
Сфера дзейнасці: Digital-marketing
Андрэй — заснавальнік кампаніі «Гусараў Груп», аднаго з вядучых digital-агенцтваў у Беларусі. Гісторыя кампаніі пачалася ў 2007, калі інтэрнэт-рынак у нашай краіне толькі пачынаў актыўна развівацца.
За больш чым 7 гадоў паспяховай працы агенцтва вырасла з невялікай фірмы, якая спецыялізуецца на SEO-прасоўванні сайтаў, у паўнавартаснае digital-агенцтва.
Андрэй актыўна падтрымлівае маладых таленавітых прадпрымальнікаў і з'яўляецца адным з фундатараў конкурсу бізнэс-ідэй і праектаў Start2Go.
18 месца
Арцём Канцавы
Узрост: 30
Месца жыхарства: Мінск
Сфера дзейнасці: Медыя
Арцём — заснавальнік dev.by, папулярнага ў Беларусі медыя-праекта ў галіне ІT. Сёння dev.by аб'ядноўвае звыш 31 тысячы зарэгістраваных прафесіяналаў і каля 1 000 беларускіх ІТ-кампаній.
У планах партала — павелічэнне колькасці беларускага кантэнту, запуск новых аўтарскіх калонак і блогаў кампаній, а таксама выхад на больш маштабныя рынкі суседніх краін.
19 месца
Антон Дзмітрыеў
Узрост: 29
Месца жыхарства: Мінск
Сфера дзейнасці: Фінансы
Антон — генеральны дырэктар групы кампаній «Будінвестлізінг». Кампанія актыўна развіваецца, нарасціўшы аб'ём лізінгавага партфеля да больш чым $20 млн.
Антон мае дыплом у галіне фінансавай стратэгіі Said Business School, University of Oxford і ступень MBA The Open University Business School. Атрыманыя веды і назапашаны досвед перадае студэнтам Бізнес-школы ІПМ, дзе працуе выкладчыкам шэрагу праграм.
20 месца
Алесь Місуна
Узрост: 29
Месца жыхарства: Мінск
Сфера дзейнасці: Digital-marketing
Алесь — сузаснавальнік digital-агенцтва Qmedia. З моманту заснавання ў 2007 годзе агенцтва правяло 1 030+ рэкламных кампаній для заказчыкаў з Беларусі і краін СНД.
Сярод кліентаў агенцтва такія вядомыя беларускія і сусветныя брэнды, прадстаўленыя на беларускім рынку, як «Еўраопт», «Юнівест-М», «Віталюр», «Буслiк», «Евросеть», Honda, Scania, Citroёn і інш.
21 месца
Аляксей Янушкевіч
Узрост: 27
Месца жыхарства: Мінск
Сфера дзейнасці: Сеткавы фаст-фуд
Аляксей — сузаснавальнік і генеральны дырэктар сеткі рэстаранаў SushiHouse. Аляксей пачаў спрабаваць сябе ў рэстаранным бізнэсе ў Маскве, дзе ён правёў 4 гады. У Маскве была першая спроба адкрыцця рэстарана на 50 пасадачных месцаў, аднак з-за рознагалоссяў з партнёрамі было вырашана прадаць рэстаран.
Вярнуўшыся ў Мінск, Аляксей стаў развіваць фармат рэстаранаў азіяцкай кухні. Сёння ў сетцы SushiHouse два рэстараны і актыўна развіваецца дастаўка сушы.
Яго імкненне да высокай якасці выканання страў не засталося незаўважаным: па версіі рэстаранна-гастранамічнай прэміі Golden Chef у 2013 годзе Sushi House атрымаў званне «Найлепшая японская кухня».
22 месца
Сяргей Цыбулін
Узрост: 29
Месца жыхарства: Мінск
Сфера дзейнасці: Фінансы
Сяргей — намеснік дырэктара ТАА «Дзікрыс» і член рады дырэктараў РРБ-Банка. Адным з акцыянераў банка з'яўляецца яго бацька.
Сяргей практычна з універсітэта прыйшоў у банк і вельмі шмат зрабіў для развіцця напрамку рознічнага бізнэсу. У 2013 годзе ён атрымаў ступень MBA у Еўрапейскім гуманітарным універсітэце.
23 месца
Павел Шышко
Узрост: 30
Месца жыхарства: Мінск
Сфера дзейнасці: Адукацыя
Павел — заснавальнік паспяховага адукацыйнага цэнтра «Шыпалекс», які прапануе бізнэс-курсы, майстар-класы, камп'ютарныя курсы і трэнінгі. Найбольш паспяховай праграмай стаў трэнінг «Бізнэс-старт», які збірае вельмі вялікія залы. За аснову трэнінгу ўзятая мадэль расійскай школы сваёй справы «Бізнэс-маладосць», якая паказвае грандыёзныя поспехі на рынку СНД і дэманструе добрыя фінансавыя паказчыкі (абарот «Бізнэс-маладосці» ў 2013 годзе склаў каля RUB 1 млрд).
Павел аўтар кнігі «Працуем з мытняй крок за крокам» і суаўтар кнігі «Бізнэс у Беларусі: сакрэты стварэння з нуля да выніку».
24 месца
Мікалай Кекіш
Узрост: 28
Месца жыхарства: Мінск
Сфера дзейнасці: ІT
Мікалай — заснавальнік CatalogLoader.com, які прадае праграмы для інтэрнэт-крам з іх далейшым укараненнем ў бізнэс-працэсы. Кампанія ўжо мае тысячы кліентаў з малога бізнэсу ў сферы электроннай камерцыі.
«Магу сказаць, што кожны квартал кампанія па абаротах вырастае на 30% у параўнанні з папярэднім. За два гады праз нас «прайшло» больш за 500 праектаў, мы аказалі больш за 2000 паслуг. Дарэчы, нашы кліенты — гэта не толькі інтэрнэт-крамы, хоць яны, безумоўна, складаюць аснову. Таксама гэта маркетынгавыя агенцтвы, якія працуюць з буйнымі пастаўшчыкамі або непасрэдна самі буйныя пастаўшчыкі», — так Мікалай распавядаў пра свае бізнэс-поспехі парталу Bel.biz.
25 месца
Дзяніс Кур'ян
Узрост: 30
Месца жыхарства: Мінск
Сфера дзейнасці: Прамоўшн
Дзяніс — вядомы тэлежурналіст, уладальнік прэміі «Тэлевяршыня» ў намінацыі «Найлепшы вядучы забаўляльных праграм», з восені 2012 — вядучы праграм «Наша раніца» і «Я люблю Беларусь».
Акрамя журналістыкі Дзяніс развівае шэраг напрамкаў у бізнэсе. Адно з іх — гэта прадакшн-студыя Promofilm, якая стварае прэзентацыйныя фільмы для беларускіх кампаній. Кліентамі прадакшн-студыі з'яўляюцца «Трайпл», «Санта Брэмар», «Савушкаў прадукт», Беларускі металургічны завод, тытунёвая фабрыка «Нёман», Беларуская чыгунка, БелВЭБ і іншыя вядомыя кампаніі.
Таксама Дзяніс інвесціруе ў вендзінгавы бізнэс.
26 месца
Аляксандр Міхалевіч
Узрост: 29
Месца жыхарства: Мінск
Сфера дзейнасці: ІT
Аляксандр — заснавальнік прафесійнай сацыяльнай сеткі Kollega.by. Ідэя стварэння сацыяльнай сеткі запазычаная ў вядомай ва ўсім свеце LinkedIn, якая мае звыш 225 мільёнаў карыстальнікаў. Аднак у Kollega.by шмат у чым іншая канцэпцыя, адаптаваная пад беларускі рынак. Асноўная мадэль манетызацыі бізнэсу — пашыраны функцыянал пошуку для працадаўцаў, прасоўванне вакансій і паслуг, інфармацыя аб наведвальніках старонак карыстальнікаў і вакансій.
Сёння на Kollega.by зарэгістравана больш за 36300 карыстальнікаў з больш за 13700 кампаній па ўсёй Беларусі.
27 месца
Аляксей Мурончык
Узрост: 28
Месца жыхарства: Мінск
Сфера дзейнасці: Будаўнічае праектаванне
Аляксей — сузаснавальнік і дырэктар праектнай майстэрні ТАА «Праект-М». Асноўныя напрамкі дзейнасці кампаніі — распрацоўка эскізных, архітэктурных праектаў і канструктыўных рашэнняў для будаўніцтва будынкаў, дызайн інтэр'еру і вонкавага выгляду будынкаў, ландшафтны дызайн. Кампанія — адзін з лідараў на рынку ў галіне малапавярховага домабудавання і актыўна скарае рынак праектаў будынкаў і збудаванняў.
У момант увядзення ў Беларусі атэстацыі ў сферы будаўніцтва і праектавання пад брэндам «Праект-М» адбылося зліццё некалькіх прыватных праектных арганізацый.
Аляксей, як магістр тэхнічных навук, развівае інавацыйныя тэхналогіі ў галіне праектнай інжынерыі.
28 месца
Улад Андросаў
Узрост: 27
Месца жыхарства: Мінск
Сфера дзейнасці: Медыцынскі турызм
Уладзіслаў — заснавальнік двух кампаній, якія працуюць у сферы медыцынскага турызму.
MedTravelBelarus — аператар медыцынскага турызму, які прапануе паслугі па арганізацыі лячэння ў беларускіх клініках. Штогод кампанія прымае каля 700 кліентаў з-за мяжы.
Таксама з 2010 года Улад развівае сегмент выязнога медыцынскага турызму для беларусаў, якія жадаюць атрымаць абследаванне, лячэнне або рэабілітацыю ў клініках за мяжой ці аздаравіцца на SPA курортах Еўропы.
Уладзіслаў з'яўляецца адным з заснавальнікаў Minsk kicker club і агентам маладога футбольнага талента — свайго роднага брата Аляксандра Андросава.
29 месца
Дзяніс Кандратовіч
Узрост: 27
Месца жыхарства: Мінск
Сфера дзейнасці: ІT
Дзяніс — прадпрымальнік, арыентаваны на сацыяльныя праекты. Ён з'яўляецца адным з заснавальнікаў дабрачыннага аўкцыёну сустрэч MaeSens.by і праекта StartIdea.by.
MaeSens.by прапануе зарэгістраваным карыстальнікам нестандартны фармат ўключэння ў дабрачыннасць, у аснове якога ляжаць механізмы аўкцыённага гандлю, сацыяльнай сеткі, віртуальнай службы знаёмстваў і краўдфандзінгу. У 2012 годзе стартап прыцягнуў пасяўныя інвестыцыі ад венчурнага інвестара Грэга Кіда, які атрымаў вядомасць дзякуючы інвестыцыям у Twitter і Squarе, і пачаў сваё развіццё на рынках Расіі і ЗША.
Дзяніс — сузаснавальнік і член журы конкурсу сацыяльных праектаў для Беларусі Social Weekend.
30 месца
Ксенія Курусь
Узрост: 22
Месца жыхарства: Мінск
Сфера дзейнасці: Сетка хостэлаў
Ксенія — сузаснавальнік хостэлаў Trinity, Riverside Hostel, Traveller і Art House. Праект, які мае цікавую канцэпцыю, у свой час падтрымаў бізнес-анёл Аляксандр Кныровіч. Ён стаў не толькі інвестарам, але і ментарам.
Унікальнасць хостэлаў Ксеніі у тым, што яны першыя ў Беларусі ўвайшлі ў Міжнародную федэрацыю моладзевых хостэлаў (IYHF), якая ўключае ў сябе амаль 80 хостэл-асацыяцый, якія налічваюць каля 4 500 хостэлаў, якія ўвасабляюць разнастайныя культуры і этнічныя формы.