Мы знайшлі беларуса, які загінуў на вайне за Расію. Ён з Маладзечна, завербаваўся адразу пасля «дэмбеля»
Віталь Чыбісаў паспеў паваяваць каля чатырох месяцаў.
25.04.2024 / 09:20
Віталь Чыбісаў. Фота з ягонай старонкі Укантакце
Памерлага клічуць Віталь Чыбісаў. На момант смерці яму было 22 гады. Родам хлопец з Клецка, пасля сям'я пераехала ў Магілёў, а затым у Дзяржынск.
Ён рос у простай сям'і — згодна з базамі «Кіберпартызанаў», маці працавала гладзільшчыцай у мясцовай бальніцы, а бацька токарам. Бацька хлопца, імаверна, выпіваў і ўжо памёр.
Імаверна, адносіны ў сям'і былі няпростыя — Віталь, яго брат і яго маці за ўвесь час не выклалі ніводнага фота разам з бацькам хлопцаў. А ў сацсетках яны карысталіся дзявочым прозвішчам маці — Сокал.
Віталь Чыбісаў у падлеткавым узросце. Фота з ягонай старонкі Укантакце
Жылі Чыбісавы небагата — сям'ёй туліліся ў інтэрнаце ў Маладзечне.
У дзяцінстве Віталь быў хуліганам. Згодна з базамі «Кіберпартызанаў», ва ўзросце 11 гадоў ён скраў чужы смартфон, а ў 13 — два ровары і яшчэ адзін смартфон проста на працы ў ягонай маці. За гэта бацькоў штораз штрафавалі, а яго самога мусілі паставіць на ўлік у міліцыю.
Віталь пасля школы скончыў Уздзенскі дзяржаўны каледж, які тады быў прафесійным ліцэем. Вядома, што ён ухіляўся ад службы ў войску і яму нават закрылі за гэта выезд з Беларусі ў 2020-м. Але служыць усё ж давялося, і ў вясенні прызыў 2021-га яго забралі ў армію.
Віталь Чыбісаў у арміі побач з маці. Фота з ягонай старонкі Укантакце
Пасля двух гадоў службы ён прабыў на «грамадзянцы» ўсяго некалькі месяцаў. Ужо ў ліпені 2023-га Чыбісаў завербаваўся на кантракт у расійскую армію, каб ваяваць супраць украінцаў. Быў на перадавой.
Дата ягонай смерці невядомая, але гэта адбылося паміж 26-м і 28-м лістапада 2023-га — яшчэ 25-га ён быў актыўны Укантакце, а 24-га выклаў бадзёрае відэа, дзе ён кіруе машынай у вайсковай форме. Абставіны гібелі Чыбісава таксама невядомыя.
Віталь Чыбісаў і яшчэ адзін найміт, Сяргей Накіпаў. Апошні родам з горада Краснадон, з красавіка 2014-га акупанавага войскамі Расія. Па звестках з ягонай архіўнай старонкі Укантакце, раней ён ездзіў на заробкі ў Расію і Беларусь.
Пахавалі Віталя ў родным Маладзечне.
Магіла Віталя Чыбісава ў Маладзечне. Фота з сацсетак
Пра смерць найміта вядома толькі праз паўгода пасля яе.
Інструктар «Вагнера» з пазыўным «Брэст»: Беларусь — такі ж кірунак, як і іншыя. А мы спатрэбімся перад выбарамі
Пад Бахмутам загінуў вагнеравец з Беларусі
Былыя сілавікі і крымінальнікі. Што за беларусы ваююць ва Украіне на баку Расіі